აიცერით, მაგრამ Green pass-ს ვერ იღებთ?

15 ოქტომბრიდან, მას შემდეგ რაც იტალიაში Green pass-ი ყველა დასაქმებული პირისთვის სავალდებულო გახდა, საკითხის გარშემო ინტერესი უფრო გაიზარდა. ემიგრანტები, ხშირად, ენობრივი ბარიერის გამო აწყდებიან სირთულეებს და აცრის მიუხედავად, დროულად ვერ იღებენ ე.წ. "მწვანე სერტიფიკატს". ეს კი, სავარაუდოდ, იქიდან გამომდინარეობს, რომ სერტიფიკატის მიღება პირველი აცრიდან მხოლოდ დაახლოებით ორი კვირის შემდეგ,  მეორე დოზის მიღებიდან კი, მეორე, ან მესამე დღეს ხდება (დამოკიდებულია რეგიონზე). ამიტომ უჭირთ დადგენა როდის, როგორ და სად აიღონ კუთვნილი სერტიფიკატი. აცრის შემდეგ, საჭიროა დაელოდოთ შეტყობინებას, რომელიც მეილზე, ან სმს-ის საშუალებით მოგივათ, რაც ნიშნავს, რომ თქვენი სერტიფიკატი მზადაა.

ამის შემდეგ Green pass-ის მისაღებად, რამდენიმე გზა არსებობს:

- შეგიძლიათ შეხვიდეთ სამთავრობო საიტზე dgc.gov.it. ამ შემთხვევაში უნდა გქონდეთ SPID (ე.წ. ციფრული პირადობა), ან გამოიყენოთ თქვენს სამედიცინო ბარათზე (Tessera sanitaria) დატანილი ფისკალური კოდი (Codice fiscale) და ბარათის ვადები. ამ შემთხვევაში ასევე უნდა მიუთითო კოდი, რომელიც მეილის ან სმს-ის საშუალებით მიიღეთ.

- App immuni, პანდემიის პერიოდში შექმნილი აპლიკაცია. ამ შემთხვევაშიც სამედიცინო ბარათის მონაცემები და მიღებული კოდი დაგჭირდებათ.

- IO კიდევ ერთი აპლიკაცია, რომელიც სხვა მრავალ ფუნქციასთან ერთად, Green pass-ის ჩამოტვირთვის საშუალებასაც გაძლევთ, ოღონდ მხოლოდ იმ შემთხვევაში, თუ უკვე გაქვთ SPID.

- თქვენი რეგიონის სამედიცინო ელექტრონული მონაცემების ბაზიდან, თქვენი პირადი სამედიცინო ბარათის საშუალებით.

- Green pass-ის მიღება ასევე შეგიძლიათ თქვენი ოჯახის ექიმის საშუალებით.

- კიდევ უფრო მარტივი გზა - შეგიძლიათ, სერტიფიკატი აფთიაქში ჩამოატვირთინოთ, ასევე პირადი სამედიცინო ბარათის საშუალებით.

შეგახსენებთ, რომ Green pass-ი არ გულისხმობს მხოლოდ კოვიდ-19-ის საწინააღმდეგო ვაქცინაციის მონაცემებს, არამედ ვირუსის გადატანის და კოვიდ-ტესტის შედეგების მონაცემებსაც.

ნინა მამუკაძე