„დოლჩე და გაბანას“ 2021 წლის ჩვენება

მსოფლიო მოდის ყურადღების ცენტრში ვენეცია მოექცა – მსოფლიო მემკვიდრეობის ძეგლთა სიაში შესულ ქალაქში „დოლჩე და გაბანას“ უახლესი კოლექცია წარმოადგინეს. სან-მარკოს მოედანზე ნანახმა ყოველგვარ მოლოდინს გადააჭარბა.

იტალიური მოდის სახლის 20-წუთიან ჩვენებას მსოფლიო ვარსკვლავებიც ესწრებოდნენ – მრავალფეროვანი, შთამბეჭდავი და ქალაქის კულტურასა და ისტორიასთან შერწყმული დეტალებით გამდიდრებული შოუ „ალტა მოდა“ მსოფლიო მოდის გამოცემების მთავარი თემაა. დიზაინერებმა ვენეციის ღირსშესანიშნაობები, არქიტექტურა და ისტორია ქსოვილებში გადაიტანეს.

„არ შემეძლო ყურადღების მიღმა დამეტოვებინა და არ მომეთხრო თქვენთვის, რომ შაბათს ვენეციაში, იდუმალსა და ფერადში, დოლჩე & გაბანას სამდღიანი „Venezia Veste“, უმაღლესი მოდის დღესასწაული მოეწყო მთელი თავისი ბრწყინვალებით.

უმძიმესი პერიოდის შემდეგ, ქალაქი მის საუკეთესო სამოსში გამოეწყო და როგორც მასპინძელმა, უამრავი სტუმარი მიიღო.

მოდის ზღაპარ-დღესასწაულისთვის წმ. მარკოს მოედანი დაიკეტა და ხასხასა წითელი ხავერდის ხალიჩა დაიგო ტაძრიდან ვიდრე სანაპირომდე, საიდანაც საღამოს ჟამს, გონდოლებით დოლჩე & გაბანას სამოსში გამოწყობილი სტუმრები და გასაოცარი ფერების, ექსკლუზიური სამოსით შემოსილი მოდელების გამოსვლა დაიწყო.
საღამოს კაბებთან ჰარმონიაში, როგორც წესი, დახვეწილი, უძვირფასესი სამკაული, გვირგვინები იქცევდა განსაკუთრებულ ყურადღებას, რომელთა უმრავლესობაც იმავე საღამოს გაიყიდა.

ცალკე უნდა აღინიშნოს სივრცე და მაგიდები სტუმრებისთვის - მსოფლიოში უმდიდრესი ქალებისთვის. მაგიდის სანათები და მაღალი ბოკლები სპეციალურად ამ დღესასწაულისთვის, მურანოს კუნძულზე დამზადდა იქაური პროფესიონალების მიერ და მათი ბრჭყვიალა პროდუქცია, ასევე სამოსისთვისაც იყო გამოყენებული.
მურანოს ფერადი ბროლით გაწყობილი საღამოს კაბები, ბრწყინვალებით თავად ვენეციის ლაგუნას მოგაგონებთ დეკორაციებითა და ორიგინალური დეტალებით.

განსაკუთრებული სტუმრებიც ჰყავდა ჩვენებას, ყოველთვის გამორჩეულ ფორმაში მყოფი ვარსკვლავები, მათ შორის ჯეილოც, რომლის ორიგინალური მოსაცმელის სახელოები, სან მარკოს გუმბათის ფორმის იყო. უნდა აღინიშნოს, რომ ჩვენებაზე მოდელების რამდენიმე თაობა გამოჩნდა. მათ შორის ცნობილი მოდელების ახალგაზრდა შვილები.“  

წყარო: Milano - ინგას მილანი 

ჩვენების სანახავად, გადადით ქვემოთ მითითებულ ბმულზე:

Venezia 2021: the Dolce&Gabbana 

ფოტოების სანახავად გადადით ქვემოთ მითითებულ ბმულზე: 

„დოლჩე და გაბანას“ 2021 წლის ჩვენება