“გადმობრალების” პრინციპი და იტალიური ბიუროკრატია, რომელიც განსაკუთრებით ემიგრანტებს ჩაგრავს

ემიგრაციაში მყოფი პირებისთვის ერთ-ერთ პრობლემურ საკითხს წარმოადგენს რესპუბლიკის სხვადასხვა ოფიციალურ უწყებებთან თუ ორგანიზაციებთან კომუნიკაცია. რიგ ლოგიკურ მიზეზთა გამო, რთულია ქვეყნის კანონმდებლობის სრულფასოვნად შესწავლა და შესაბამის საკითხებში გარკვევა. ხშირად, მსგავსი ისტორიები ემიგრანტს მეტად უმძიმებს ყოფას და სტრესულ მდგომარეობაში აყენებს.

ჩვენი კორესპონდენტი მილანიდან, იტალიის ფოსტასთან დაკავშირებული ბიუროკრატიული ინციდენტის შესახებ გვიყვება:

PostaItalia-ს მომსახურე პერსონალის უპასუხისმგებლობას ზღვარი არ აქვს. ლომბარდიის რეგიონში თითქმის ყველა “ჩამოსულს” ჰქონია ერთხელ მაინც მათთან შეხება. თუ ენის ბარიერი გაქვს, ხომ საერთოდ წასულია შენი საქმე.

ვიცით რომ იტალიაში თითქმის, ერთი თვეა ყველა დაწესებულებაში შესვლა თავისუფალია, თუმცა ფოსტის კარი მაინც დახურულია. საათიანი რიგები შესასვლელთან, უამრავი ხალხი ლოდინის რეჟიმში. კარის გასაღები ღილაკი სკოჩით ამოქოლილი, თან აწერია - “ზარი არ დარეკოთ”, - წუხდებიან რა ქნან. ბოლოს თუ გაგიმართლა შესვენებამდე შედიხარ, თუ არადა ცხვირწინ, უხეში მზერით და აქეთ საყვედურით გიხურავენ კარს.

წესით, postaitalia ერთ-ერთი ის დაწესებულება უნდა იყოს, რომელიც ყველაზე ოპერატიულად და გამართულად უნდა მუშაობდეს თუმცა არა, დამღლელი რიგის შემდეგ შესვლისთანავე, დაძაბულ და გაღიზიანებულ ოპერატორებს კითხვასაც კი ვერ დაუსვამ, უხეში პასუხი რომ არ მიიღო… ყველაფერი უნდა იცოდე აბა რა, თუ არ იცი და მაინც ჰკითხე, ორ სიტყვას გესვრიან და თუ კითხვა შეუტრიალე დასაზუსტებლად, მაშინვე აგრესიაზე გადმოდიან… კარგად თუ არ ხარ ინფორმირებული, დახმარებაზე ხომ საუბარი ზედმეტია, ისე გამოხვალ იქიდან ნახევარი საქმე გასაკეთებელი დაგრჩება… ფოსტა, ელემენტარულად კონვერტს არ გაძლევს წერილის ჩასადებად, - არ აქვთ! გაგზავნიან საყვედურებით საყიდლად, ესეც უნდა იცოდეთ! საკითხის გარკვევისას ისე გეჩხუბებიან თითქოს მათი გმართებდეს რამე, ხოლო განსაკუთრებული აგრესია ემიგრანტებზე მოდის. გადმობრალების და ჩაგვრის ინსტინქტი საუკეთესოდ აქვთ განვითარებული. “ყოვლისმცოდნე” უვიცების მსხვერპლი ემიგრანტებში ძალიან ბევრია…

ქართველი ემიგრანტების საყურადღებოდ, განსაკუთრებით მათთვის, ვისაც ენის ბარიერი აქვს, როცა ამ დაწესებულებაში მოგიწევთ წასვლა, აუცილებლად ან მოიძიეთ წინასწარ ყველა ინფორმაცია, ან გაიყოლეთ ენის მცოდნე და მეტ-ნაკლებად ინფორმირებული ადამიანი, რათა დრო, ნერვები და ენერგია ტყუილად არ დაკარგოთ.

ანუკა ღონღაძე. იტალია. მილანი

აგრეთვე დაგაინტერესებთ:

📌 არალეგალურად დასაქმებული ჭურჭლის მრეცხავი, სექსუალური ძალადობის მსხვერპლი გახდა

📌 გაიცანით სოფია ღურწკაია - ოქროს მედლის მფლობელი და წარმატებული სპორტსმენი იტალიაში

📌 ემიგრაციაში უსაშინლესი პრობლემაა ე.წ. დამსაქმებლის ინსტიტუტი, ისინი თაღლითურად, თვეში რამდენჯერმე ყიდიან სამსახურს - ანა ბურდული