იტალია მესამე დოზით ვაქცინაციას იწყებს

Green pass-ის მოწინააღმდეგეთა მიერ ორგანიზებული აქციების ფონზე, იტალია კოვიდვაქცინის ბუსტერის გამოყენებას იწყებს. ვაქცინის მესამე დოზა პირველ რიგში რისკის ჯგუფებში მყოფ პირებსა და 60 წელს გადაცილებულ მოქალაქეებს გაუკეთდებათ.

ჯანდაცვის სამინისტროს ოფიციალური განცხადებიდან ვიგებთ, რომ მოქალაქეები მესამე დოზას ვაქცინაციის ციკლის დასრულებიდან ექვსი თვის შემდეგ მიიღებენ.

ამ ეტაპზე, ჯერ კიდევ აუცრელია იტალიის მოსახლეობის 15,54% (იგულისხმება 12 წელს ზემოთ), აქედან კრიტიკულ ასაკობრივ ჯგუფში თითქმის სამი მილიონი ადამიანია.

თუმცა, პრემიერ მარიო დრაგის თქმით, ყველაზე ცუდი უკან დარჩა: „ერთობლივმა ძალისხმევამ რომ სიტუაცია კონტროლის ქვეშ მოგვექცია, შედეგი გამოიღო, რაც იმედს იძლევა რომ პანდემიის დასასრული ახლოსაა. ვაქცინაციის კამპანიის წყალობით, ბევრმა ქვეყანამ შეძლო კოვიდკრიზისიდან თავის დაღწევა.“

ამ ეტაპზე, ვაქცინაციის ცენტრები იტალიაში კვლავ სრული დატვირთვით ფუნქციონირებენ და ამავე რეჟიმში გააგრძელებენ მუშაობას, სანამ ვაქცინაციის მესამე დოზის ციკლი არ დასრულდება.

რაც შეეხება ეპიდემიოლოგიურ სიტუაციას იტალიაში, შეიძლება ითქვას რომ კონტროლქვეშაა. მონაცემები ეტაპობრივად უმჯობესდება. საშუალო მაჩვენებელი ასეთია: 34 დაინფიცირებული ყოველ 100 000 მოსახლეზე, ხოლო თუ დაინფიცირებულთა რაოდენობას ქვეყნის მთელი მოსახლეობის რაოდენობას შევადარებთ, მაჩვენებელი 0.83-ია. მაგალითისათვის, ჯერ კიდევ ზამთრის თვეებში ეს მაჩვენებელი ხშირად 10-ს აჭარბებდა. სპეციალისტების განცხადებით ეს ყველაფერი დროული რეგულაციების და Green pass-ის დამსახურებაა. 

ნინა მამუკაძე