იტალიაში 16 დეკემბერს გაფიცვაა - საზოგადოებრივი ტრანსპორტი შეზღუდული გრაფიკით იმუშავებს

იტალიის პროფკავშირები 16 დეკემბერს მთელი იტალიის მასშტაბით გაფიცვას აანონსებს.

პროფკავშირების სლოგანი შემდეგია - „ერთად სამართლიანობისკენ“, ისინი არასტაბილურ სამუშაო გარემოს, საპენსიო და საგადასახადო პოლიტიკას და კანონში შეტანილ საბიუჯეტო ცვლილებებს აპროტესტებენ. მანიფესტაციები გაიმართება ხუთ დიდ ქალაქში: მილანი, ბარი, კალიარი, პალერმო და რომი. რომში „პიაცა დელ პოპოლოზე“, ორივე პროფკავშირების პირველი პირების, მაურიციო ლანდინისა და პიერპაოლო ბომბარდიერის გამოსვლები იგეგმება.

გაფიცვა არ შეეხება სამედიცინო დაწესებულებებს, სკოლებსა და ფოსტას. გაფიცვაში აქტიურად ჩაერთვება საზოგადოებრივი ტრანსპორტი, გარკვეული გამონაკლისის გარდა.

მატარებლები - სარკინიგზო მომსახურება შეწყდება შუაღამიდან, მეორე დღის 21 საათამდე, მაგრამ გარანტირებული იქნება მატარებლების მომსახურება 6.00-დან 9.00 საათამდე და 18.00-დან 21.00 საათამდე (ეხება საშუალო და გრძელ მარშრუტებს).

საჰაერო მიმოსვლა - ფრენები შეწყდება შუაღამიდან შუაღამემდე. გაფიცვაში ერთვებიან როგორც პილოტები, ასევე თვთმფრინავებისა და აეროპორტების მომსახურე პერსონალი. მომსახურება დროებით აღდგება 7.00-დან 10.00 საათამდე და 18.00-დან 21.00 საათამდე.

საზოგადოებრივი ტრანსპორტი - გაფიცვა შეეხება ყველა დიდი ქალაქის (გარდა ვენეციისა და ბარისა) ავტობუსებს, მეტროს, ტრამვაის და ლოკალურ მატარებლებს. ტრანსპორტი სხვადასხვა ქალაქებში სხვადასხვა გრაფიკით გაიფიცებიან - მილანი: 8.45-დან 15 საათამდე და 18.00-დან გაფიცვის დასრულებამდე; რომი: 8.30-დან 17.00 საათამდე და 20.00-დან გაფიცვის დასრულებამდე; ტურინი: 8.00-დან 14.30 საათამდე და 17.30-დან გაფიცვის დასრულებამდე; გენუა: 9.00-დან 17.30 საათამდე და 20.30-დან გაფიცვის დასრულებამდე; ბოლონია: 8.30-დან 16.30-მდე და 19.30-დან გაფიცვის დასრულებამდე; ფლორენცია: 9.00-დან 12.00 საათამდე და 15.00-დან გაფიცვის დასრულებამდე; ნეაპოლი: 8.30-დან 17.00 საათამდე და 20.00 საათიდან გაფიცვის დასრულებამდე. 

ნინა მამუკაძე