იტალიაში იანვრიდან კომუნალური გადასახადები იზრდება

იტალიაში ტარიფების ზრდა როგორც ელექტროენერგიაზე, ისე გაზზე 2022 წლის იანვრიდან იგეგმება.

გაზის ღირებულება ახალი წლიდან ერთ კუბურ მეტრზე 1,55 ევრომდე გაიზრდება, რაც ნიშნავს +61%-ს. ელექტროენერგიის საფასური კი კილოვატსაათში გაიზრდება 43,8 ჩენტეზიმამდე, რაც პროცენტულად შეადგენს 48%-ს.

კომუნალურ გადასახადებზე კატასტროფული ზრდა ნეგატიურად აისახება ისედაც ეკონომიკურ კრიზისში მყოფი ქვეყნის მოსახლეობისთვის. დღესდღეობით იტალიაში გაზრდილია იმ ოჯახების რაოდენობა, რომელთა შემოსავლებიც შემცირდა. შესაბამისად მათ გაზრდილი ტარიფების გადახდა გაუჭირდებათ.

იტალიის მთავრობამ, პრემიერ-მინისტრ მარიო დრაგის ინიციატივით, ტარიფების მოსალოდნელი გაზრდის გათვალისწინებისა და ზოგადად ეკონომიკური კრიზისიდან თავის დაღწევის მიზნით, ახალი პროგრამა შეიმუშავა. იტალიის სახელმწიფომ სუბსიდირების სახით 1,8 მილიარდზე მეტი გამოყო ელექტროენერგიის სექტორში 2022 წლის პირველი სემესტრისთვის.

მოსახლეობას კი აძლევს საშუალებას, 2022 წლის იანვრიდან აპრილის ჩათვლით მოსული გაზისა და ელექტროენერგიის  გადასახადები 10 ნაწილად გაუყოს. ეს არის ამ დროისათვის ერთადერთი დახმარება მოსახლეობისთვის რომ მოსალოდნელი გაძვირებული ტარიფების გადახდა შეძლონ.

ნონა გედენიძე სპეციალურად ExclusiveTV.ge-თვის ემილია-რომანიადან