იტალიაში სასწავლო პროცესი საკლასო ოთახებში განახლდება

იტალიაში სასწავლო პროცესი საკლასო ოთახებში განახლდება. იტალიის განათლების მინისტრმა პატრიციო ბიანკიმ არ დააკმაყოფილა 1500 სკოლის დირექტორის ხელმოწერილი მიმართვა, რომელიც სასწავლო პროცესის საკლასო ოთახებში განახლების ორი კვირით გადადებას ითვალისწინებდა. დირექტორების განცხადებით, ამ გზით მოსწავლეებს აცრისთვის დროს მისცემდნენ.

"ჩვენ ძალიან ყურადღებით ვართ იმ ინფორმაციის მიმართ, რაც პანდემიასთან დაკავშირებით მოდის ჩვენამდე, მაგრამ ამავე დროს უნდა გავითვალისწინოთ იმათი აზრიც, ვისაც სასწავლო პროცესის განახლება, დასწრებით რეჟიმში სურთ", ამის შესახებ განათლების მინისტრმა პროფკავშირების წარმომადგენლებს განუცხადა, რომლებიც შეშფოთებულნი არიან საგანმანათლებლო დაწესებულებების პერსონალისა და მოსწავლეების იმ რაოდენობის გამო, რომლებიც კარანტინში იმყოფებიან.

ომიკრონის გავრცელების სისწრაფიდან და პანდემიური ზოგადი სურათიდან გამომდინარე, სასწავლო პროცესის ორი კვირით გადადების მომხრეა ექიმთა ფედერაციის პრეზიდენტი ფილიპო ანელიც, მაგრამ ამის საპასუხოდ მინისტრი აცხადებს - "იტალია მიჰყვება ევროკავშირის მიერ განსაზღვრულ ნორმებს, მით უმეტეს, რომ იტალია ევროპაში პირველ ადგილზეა ვაქცინირებული მოსახლეობის რაოდენობით, მაგრამ ეს არ ნიშნავს იმას, რომ ყურადღება უნდა მოვადუნოთ. ჩვენ განვსაზღვრეთ კონკრეტული მითითებები: კლასში ერთი ინფიცირებულის გამოვლენის შემთხვევაში, უნდა გაძლიერდეს კლასზე დაკვირვება, ხოლო ორი დაინფიცირებულის გამოვლენის დროს კლასი გადავა დისტანციურ სწავლებაზე. მაღალი კლასების შემთხვევაში, ერთი დაინფიცირებულის გამოვლენის შემდეგ, ძლიერდება მეთვალყურეობა, მეტის შემთხვევაში - ვაქცინირებულებსა და აუცრელებს შორის იქნება განსხვავება," - განაცხადა მინისტრმა.

სწავლების დისტანციურ რეჟიმზე გადასვლა უფრო სკოლამდელ და დაწყებით კლასებს "ემუქრებათ", რადგან 12 წელს ზემოთ ბავშვების ვაქცინაცია, უკვე დიდი ხანია დაწყებულია და 12-დან 19 წლამდე მოზარდების 70% უკვე აცრილია.