“იტალიაში სხვის მოსამსახურეობაში რომ ამომხდა სული და ბინა ისე ვიყიდე, იმ სახლში ვერც უკრაინელ ლტოლვილებს შევუშვებ!” - ემიგრანტი იტალიიდან

სოციალურ ქსელ ფეისბუკზე, ქართველი ემიგრანტების ერთ-ერთ ჯგუფში, იტალიაში მცხოვრები ქართველი ემიგრანტი, რომელიც ქსელში დარეგისტრირებულია როგორც ლალი ლალი, აფიქსირებს მოსაზრებას, თუ რატომ ვერ დაუთმობს საკუთარ საცხოვრებელს, უკრაინელ ლტოლვილებს:

"გუშინ, დასვენების დღე მქონდა და პიაცაზე გავედი, ყველა უკრაინაზე ლაპარაკობდა. წინა კვირას დახმარება გავუგზავნეთ აქაური ქართველების სახელით, მეც ჩემი წვლილი შევიტანე, მაგრამ თურმე ვიღაცის თვალში საკმარისი არ ყოფილა.

მომიბრუნდა ერთი ქალი და მეუბნება, თბილისში დაკეტილი სახლი რომ გაქვს, რათ არ შეუშვებ უკრაინელ ლტოლვილებსო?! აღარ ვიცოდი რა უნდა მეთქვა, სხვა ქალებიც ისე გაჩუმდნენ, იმას ეთანხმებოდნენ. მაშინვე კი ვუპასუხე, შენს შვილებთან რატომ არ მიგყავს სახლში-მეთქი, მაგრამ ისე ცუდად გავხდი, მეორედ იქ მისვლა აღარ მინდა.

რა ვქნა, წელებზე ფეხს რომ ვიდგამდი, სხვის მოსამსახურეობაში რომ ამომხდა სული იტალიაში, კაპიკ-კაპიკ რომ ვადებდი ფულს და ისე რომ ვიყიდე სახლი, გავარემონტე, თუ გინდათ გამლანძღეთ, მაგრამ ვერავის შევუშვებ იმ სახლში, ვერც უკრაინელებს. ერთი სული მაქვს საქართველოში დავბრუნდე და სიბერე მაინც მშვიდად გავატარო. ახლა რომ შევუშვა, მერე როგორ გამოვყარო გარეთ," - წერს ქართველი ემიგრანტი.