იტალიაში თავშესაფრის მოთხოვნა, ნებისმიერი ეროვნების მქონე პირს შეუძლია - უკრაინელი ლტოლვილების გამო პროცესი არ დაიბლოკება

იტალიაში, თავშესაფრის მოთხოვნის ე.წ. „აზილოს“ თემა ერთ-ერთი ყველაზე აქტუალური და განხილვადია საემიგრაციო საზოგადოებაში, რადგან ფაქტობრივად ეს არის ერთ-ერთი ძირითადი საშუალება (თუ არ გავითვალისწინებთ Sanatoria-ს და Flussi-ს), რომლის საშუალებითაც სრულწლოვანმა პირმა, რომელსაც მიმღებ ქვეყანაში არავინ ჰყავს, ლეგალურად ცხოვრების უფლება მოიპოვოს,  რა თქმა უნდა, მთელი რიგი პროცედურების გავლის შემდეგ. 

მკითხველს შევახსენებთ, რომ პროცესი კომპლექსური და ხანგრძლივია, დაცვის ფორმაც სხვადასხვაგვარი. აღნიშნული თემა ჩვენს მედიამაუწყებელს არაერთხელ გაუშუქებია დეტალურად, მაგრამ ამჯერად ყურადღება ბოლო დღეებში გავრცელებულ ინფორმაციაზე გვინდა გავამახვილოთ, რომელიც, ჩვენს მიერ პირადად გადამოწმების შემდეგ, დეზინფორმაცია აღმოჩნდა.

გავრცელდა ინფორმაცია, რომ უკრაინიდან შემომავალი ლტოლვილების დიდი ნაკადის გამო, სხვა ეროვნების წარმომადგენლებისთვის თავშესაფრის მოთხოვნის განაცხადების მიღება, აპრილის თვეში აღარ მოხდებოდა, რამაც ემიგრანტების მღელვარება გამოიწვია. 

ExclusiveTV-მ ინფორმაცია პირადად გადაამოწმა ფლორენციის ქვესტურაში, სადაც განგვიცხადეს, რომ გავრცელებული ინფორმაცია სიმართლეს არ შეესაბამებოდა. ქვესტურის თანამშრომლის თქმით, მათ ამის თაობაზე, არანაირი ოფიციალური დირექტივა არ მიუღიათ.

ნეაპოლში ინფორმაციის გადამოწმება ვთხოვეთ მედიატორსა და თარჯიმანს მაკა ხაჩოშვილს, რომელიც ნეაპოლის პრეფექტურასთან თანამშრომლობს, სადაც მას ასევე განუცხადეს, რომ აღნიშნული ინფორმაცია სიმართლეს არ შეესაბამება და პროცესი თანაბრად მიმდინარეობს ყველა ეროვნების წარმომადგენლისთვის.

ნინა მამუკაძე 

იტალია, ფლორენცია

აგრეთვე დაგაინტერესებთ:

📌  Ricongiungimento familiare - ოჯახის შემოერთება იტალიაში - კითხვებზე პასუხი (VIDEO)

📌 იტალია: როდის გაქვთ უფლება დატოვოთ სამსახური და რა ფორმით!

📌 იტალია - როგორ იცვლება კარანტინის პირობები 1-ლი აპრილიდან

📌 იტალიაში 1-ლი აპრილიდან სად უქმდება Green pass-ის ვალდებულება?!