იტალიელი ერი ბერდება

იტალიელი ერი დაბერების საფრთხის წინაშე დგას. გამოქვეყნდა 2020-2021 წლების შობადობის და მოხუცებულთა სიკვდილიანობის სტატისტიკა. სტატისტიკის სახელმწიფო დეპარტამენტის მიერ გამოქვეყნებული რიცხვები შემაშფოთებელია. დღესდღეობით იტალიაში ერთ ბავშვზე 5.1 მოხუცი მოდის. ათი წლის წინ, 2011 წელს, ეს შეფარდება ერთი 3.8-ზე იყო, ხოლო 1971 წელს ერთი 1.1-ზე.

ფაქტი სახეზეა, თუნდაც მხოლოდ ბოლო ორი წლის შობადობის მონაცემებს გავითვალისწინებთ. 2020 წელს, იტალიაში სულ 405 ათასი ბავშვი დაიბადა, ხოლო 2021 წელს - 385 ათასი, ანუ  20 ათასით ნაკლები. როგორც სტატისტიკის დეპარტამენტის პრეზიდენტი ჯანკარლო ბლანჯარდო აცხადებს, 60 მილიონიანი ქვეყნისთვის წელიწადში 385 ათასი ახალშობილი, ტრაგედიის ტოლფასია.

რამდენად უცნაურიც არ უნდა იყოს, შობადობის მაჩვენებელი რეგიონების მიხედვით, მკვეთრად განსხვავდება. ყველაზე ცუდი მდგომარეობა ამ მხრივ, ლიგურიის რეგიონშია. ლიგურიას თამამად შეგვიძლია ვუწოდოთ მოხუცების რეგიონი, სადაც ერთ ბავშვზე რვა მოხუცი მოდის. ამ მხრივ ყველაზე უკეთესი მდგომარეობა კამპანიისა და ტრენტინო-ალტო-ადიჯეს რეგიონებშია, სადაც შეფარდება ერთი 3.8-ზეა.

პანდემიამ იტალიის მოსახლეობას თავისი კვალი ამ კუთხითაც დაამჩნია. კოვიდს ათიათასობით მოხუცი შეეწირა, მაგრამ ერის დაბერების სტატისტიკაზე დიდი გავლენა არ მოუხდენია, რადგან სიკვდილიანობის ზრდის პარალელურად, ქვეყანაში შობადობაც შემცირდა. როგორც ჩანს, პანდემიით გამოწვეულმა კრიზისმა და არასტაბილურმა სოციალურმა ფონმა, შობადობის მაჩვენებელზეც იმოქმედა.