მამა იოანე: „წამლის სითხეში ვეძებთ ჩასახლებულ ეშმაკს, არადა ის ჩვენშია, ჩვენს ქმედებებში“

რომის, ანდრია პირველწოდებულის სახელობის ეკლესიის წინამძღვარი მამა იოანე (ხელაია), სოციალურ ქსელ ფეისბუკში წერილს აქვეყნებს და საზოგადოებას მიმართავს -  „წამლის სითხეში ვეძებთ ჩასახლებულ ეშმაკს, არადა ის ჩვენშია, ჩვენს ქმედებებში“.

„როგორი ქაოსი, პანიკა და შიში სუფევს ჩვენს ქვეყანაში. ყველას შეგვეხო პირდაპირ თუ ირიბად, ყველა შეგვაშინა და დაზაფრულები ვართ. ამ ბოლო მოვლენებმა დამანახვა, რომ ყველა ვირუსზე, ყველა სნეულებაზე საშიში ადამიანი ყოფილა. ყველაზე დაუნდობელი.

არა შეწყალება, არა თანაგრძნობა და რაც უმთავრესია - არა სიყვარული. წამლის სითხეში ვეძებთ ჩასახლებულ ეშმაკს, არადა ის ჩვენშია, ჩვენს ქმედებებში. სადაც სიყვარული არ არის, სადაც მოწყალება და თანაგრძნობა არ არის, იქ მხოლოდ ბოროტია.

არც წამლის დეფიციტი დაგვღუპავს და არც წყლის, არც ნავთობის, არც ხორბლის, არამედ დეფიციტი სიყვარულისა. რასაც მთელი სამყარო განიცდის დღეს. არანაირი ვირუსი ისე არ დაგვაზიანებს როგორც გაბოროტებული ადამიანი. სიყვარულის დეფიციტი აი ეს არის ყველაზე დამღუპველი ვირუსი,რომელიც ანადგურებს ყველას და ყველაფერს!ღმერთმა გვიშველოს ყველას. ღმერთი არის სიყვარული!“ - წერს არქიმანდრიტი.