რა არის PEC-ი? - ინფორმაცია იტალიაში მცხოვრები ქართველებისთვის

როდესაც იტალიაში საქმიანი საბუთების წარმოებასა და ოფიციალურ მიმოწერასთან მოგიწევთ შეხება, გაიგებთ შემდეგ ფრაზას - ელექტრონული წერილი უნდა გამოგზავნოთ PEC-ის საშუალებით. ეს ხდება განსაკუთრებით მაშინ, როდესაც საბუთების გამო შეხება გიწევთ, ქვესტურასთან, პრეფექტურასთან, სასამართლოსთან და ა.შ.

რა არის PEC-ი? ეს არის სერტიფიცირებული ელექტრონული ფოსტა, რომელიც საშუალებას გაძლევთ, გააგზავნოთ იურიდიული ღირებულების მქონე ელექტრონული წერილი  დაბრუნების ქვითრით (ricevuta di ritorno), რაც გარანტიას იძლევა, რომ თქვენი წერილი ადრესატამდე მივიდა.

PEC-ის საშუალებით გაგზავნილ წერილს აქვს იურიდიული ღირებულება, რადგან ის, მფლობელის მიერ, ელექტრონულად არის ხელმოწერილი და უსაფრთხოების სისტემის გათვალისწინებით, უზრუნველყოფილია შინაარსის სიზუსტე, რაც შეუძლებელს ხდის შეტყობინებაში, ან მის დანართში რაიმე სახის მოდიფიკაციის განხორციელებას.
რაც მთავარია, ზოგავთ დროს, რომელიც ფოსტაში ძალიან გრძელ რიგში უნდა დაკარგოთ.

PEC-ის ქონა აუცილებელია კომპანიებისთვის, ინდივიდუალური მეწარმეებისთვის, ბუღალტრებისთვის, იურისტებისთვის და ა.შ, მაგრამ ბოლო პერიოდში, მას უფრო და უფრო ხშირად გამოიყენებენ კერძო პირებიც.
გასათვალისწინებელია ის ფაქტი, რომ PEC-ი ფასიანი. სტანდარტული პაკეტი წელიწადში 8 ევრომდე ღირს. არის ასევე პრემიუმ პაკეტები, რომლებიც წელიწადში 25 და 40 ევრო ჯდება, მაგრამ კერძო პირისთვის, სტანდარტული პაკეტი სრულიად საკმარისია.

ნინა მამუკაძე