როდის გამოდის ახალი Flussi - იტალია ემიგრანტებს ლეგალურად დასაქმების კიდევ ერთ შანსს აძლევს

წინასწარ გავრცელებული ინფორმაციის საფუძველზე, ცნობილი ხდება, რომ იტალიის მთავრობა ლეგალურად დასაქმების მსურველი უცხოელებისთვის, ე.წ. Flussi-ის გამოშვებას აპირებს. ბრძანებულება მზადაა და მინისტრთა საბჭომ შობამდე უნდა მოაწეროს ხელი. აღნიშნულ საკითხთან დაკავშირებით, განსაკუთრებული აქტიურობით შრომისა და შინაგან საქმეთა მინისტრები გამოირჩევიან.

ბრძანებულების ძალაში შესვლის შემთხვევაში, ათიათასობით უცხოელს საშუალება მიეცემა ლეგალურად შემოვიდეს და დასაქმდეს იტალიაში და ეს არ გულისხმობს მხოლოდ სეზონურ სამუშაოებს. წლევანდელი Flussi-ით გათვალისწინებული იქნება სუბორდინაციული, ავტონომიური და სეზონური ტიპის სამუშაოები - სატრანსპორტო, სამშენებლო, ტურისტულ, სოფლის სამეურნეო და სხვა სექტორებში.

წლევანდელი კვოტა შარშანდელთან შედარებით(30 850), შთამბეჭდავადაა გაზრდილი და 80 000-ს შეადგენს. რაც შეეხება იმ უმნიშვნელოვანეს საკითხს, თუ რომელ ქვეყნებს შეეხება ახალი ბრძანებულება, ჯერჯერობით სრული სია გამოქვეყნებული არ არის. ამ ეტაპზე ცნობილია, რომ სიაში შესულები არიან შემდეგი ქვეყნები: ალბანეთი, ალჟირი, ბანგლადეში, კოსტა დავორიო, ეგვიპტე, კორეა, ტუნისი და სხვა მრავალი. როგორც ზემოთ აღვნიშნეთ, ეს არასრული სიაა, ამიტომ დაველოდოთ ბრძანებულების ოფიციალური ტექსტის გამოქვეყნებას და იმედი დავიტოვოთ, რომ სიაში საქართველოც მოხვდება. 

წყარო: https://stranieriinitalia.it/attualita/decreto-flussi-per-80mila-stranieri-in-arrivo-prima-di-natale/?fbclid=IwAR1fodnsJ_UZySJLshqB4WHBM8r6uYkTXyhgmwhrxVKKtcm8bIM_XREHHBg