როგორი ეპიდსიტუაციაა იტალიაში და რატომ გახდა რეგულაციების მკვეთრად გამკაცრება საჭირო - სტატისტიკა

23 დეკემბერს, იტალიის მთავრობისა და პრემიერ მარიო დრაგის გადაწყვეტილებით, ძალაში შევიდა ახალი ბრძანებულება, რომლის თანახმადაც, სხვა არაერთ შეზღუდვასთან ერთად, ღია სივრცეში ნიღბის ტარების ვალდებულებას, Super Green Pass-ის მოქმედების არეალს, დახურულ სივრცეში FFP2 ტიპის ნიღბების ტარებას და დისკოთეკების დახურვას გულისხმობს. რეგულაციები, ამ ეტაპზე 31 იანვრამდეა გაწერილი.

და მაინც, რატომ გადადგა ეს ნაბიჯი იტალიამ?

17-23 დეკემბრის მონაცემებით, დაინფიცირების ინდექსი, კვირაში 100 ათას მოსახლეზე, 351 გახლდათ, მაშინ როდესაც ერთი კვირით ადრე, მხოლოდ 241 ახალი დაინფიცირებული იყო (ისევ 100 ათას მოსახლეზე). განსხვავება ნათელია.

განსაკუთრებით საგანგაშო მაჩვენებელია ვენეტოს რეგიონში - 590 შემთხვევა 100 ათას მოსახლეზე. მას ლომბარდია მოსდევს, შემდეგ პიემონტე, ბოლცანოს ავტონომიური პროვინცია და ფრიული-ვენეცია-ჯულია არიან. დაინფიცირების ინდექსი ყველაზე დაბალი მოლიზეს რეგიონშია.

მკვეთრად არის გაზრდილი დაინფიცირების შემთხვევები, რომელიც ჯაჭვური პრინციპით არ მომხდარა, ანუ ვერ დგინდება პირს საიდან, ან ვისგან გადაედო ვირუსი. ასეთი შემთხვევა, ბოლო ერთ კვირის განმავლობაში, 62 669 დაფიქსირდა.

გაზრდილია რეანიმაციაში მკურნალობის საჭიროების მქონე პაციენტთა ინდექსიც და შეადგენს 10,7 პროცენტს. გასულ კვირასთან შედარებით 1 პროცენტიანი ზრდაა. მაშინ როდესაც ზღვრად განსაზღვრულია 10%. ამ ზღვარს გადააჭარბა 11-მა რეგიონმა და ავტონომიურმა პროვინციამ, ესენია: კალაბრია, ემილია-რომანია, ფრიული-ვენეცია-ჯულია, ლაციო, ლიგურია, ლომბარდია, მარკე, ბოლცანოს ა.რ, ტრენტოს ა.რ, პიემონტე, ტოსკანა, ვენეტო.

9 რეგიონმა კი, 15 პროცენტს გადააჭარბა საავადმყოფოებში კოვიდ პაციენტებისთვის განკუთვნილ რაოდენობას: კალაბრია, ფრიული-ვენეცია-ჯულია, ლიგურია, მარკე, ბოლცანოს ა.პ, ტრენტოს ა.პ, სიცილია, ვალე-დ’აოსტა, ვენეტო.

კიდევ ერთი მიზეზი, თუ რატომ მიიღო ქვეყნის მთავრობამ ასეთი ხისტი გადაწყვეტილება, ვირუსის ახალი ვარიანტი „ომიკრონია“ რომელიც აქამდე არსებულ შტამებს შორის, ყველაზე სწრაფად ვრცელდება. მართალია, დაინფიცირების შემთხვევაში, ვირუსი შედარებით მსუბუქად მიმდინარეობს, მაგრამ საავადმყოფოების გადავსებასა და კოლაფსს არ გამორიცხავს.

მოამზადა ნინა მამუკაძემ