რუსეთის საელჩოს პროვოკაცია იტალიელი პოლიტიკური ლიდერების მიმართ, წინასაარჩევნოდ

25 სექტემბერს, იტალიაში ვადამდელი საპარლამენტო არჩევნებია. ლიდერი პოლიტიკური პარტიები, აქტიურ საარჩევნო კამპანიას ეწევიან ამომრჩევლის გადასაბირებლად, მაგრამ ამ არჩევნებზე პოლიტიკოსთა შესაფასებლად, ამ ყველაფერს, ერთი უცნაური კრიტერიუმი დაემატა - არის, ან იყო თუ არა, ესა თუ ის პოლიტიკური პარტია რუსეთის პრეზიდენტის, ვლადიმერ პუტინის "მეგობარი". 

როგორც ჩანს, ეს ტენდენცია არც რუსეთის მხარეს დარჩენია შეუმჩნეველი. არჩევნებამდე რამდენიმე დღით ადრე, რუსეთის საელჩომ ფოტოკოლაჟი გამოაქვეყნა, სადაც თითქმის ყველა იტალიელი პოლიტიკური ფიგურა, თუ ლიდერი, ვლადიმერ პუტინთან ერთად პოზირებს. 

ესენი არიან: ჯუზეპე კონტე, მატეო სალვინი, ლუიჯი დი მაიო, სერჯო მატარელა, მატეო რენცი, პაოლო ჯენტილონი და სხვები.

თვალშისაცემია, ის ფაქტი, თუ ვინ არ არის გამოსახული ფოტოებზე. ეს პოლიტიკოსი ჯორჯა მელონია. თუ რუსული პოლიტიკური თამაშების მოძველებულ სტილს გავითვალისწინებთ, რუსეთის საელჩოს ეს პროვოკაცია, პირდაპირ ჯორჯა მელონის საარჩევნო კამპანიის წისქვილზე ასხამს წყალს.

პუტინის რუსეთის მიმართ გაზრდილი საყოველთაო ნეგატივის ფონზე, პუტინთან გადაღებული ფოტოების გამოქვეყნება, ნებისმიერი პოლიტიკოსის იმიჯისთვის დამაკნინებელია, მიუხედავად იმისა, თუ როდის არის ეს ფოტოები გადაღებული.

ეს ყველაფერი რუსული აგენტურის მიერ ჯორჯა მელონის საარჩევნო კამპანიის ლამაზად შეფუთვის მცდელობას ჰგავს, დანარჩენი პოლიტიკოსების გაშავების ფონზე.