აჭარის ჯანდაცვის სამინისტროს „ეკომიგრანტი ოჯახების საცხოვრებლით უზრუნველყოფის“ პროგრამის ფარგლებში, 17 ეკომიგრანტ ოჯახს საცხოვრებელი ფართები დაურეგისტრირდა

ბათუმის იუსტიციის სახლში, აჭარის ჯანდაცვის სამინისტროს „ეკომიგრანტი ოჯახების საცხოვრებლით უზრუნველყოფის“ პროგრამის ფარგლებში, 17 ეკომიგრანტ ოჯახს მათ მიერ შერჩეული უსაფრთხო საცხოვრებელი ფართები დაურეგისტრირდა. აღნიშნულის შესახებ ინფორმაციას აჭარის ჯანდაცვის სამინისტრო ავრცელებს.

მათივე ცნობით, სტიქიით დაზარალებულებმა სახლი/ბინა/მშენებარე ფართი სამინისტროს თანადაფინანსებით შეიძინეს, თითოეულ ოჯახს გამოეყო 50 000 ლარი.

ოჯახებს ახალი საცხოვრისის შეძენა აჭარის ჯანმრთელობისა და სოციალური დაცვის მინისტრმა, ნინო ნიჟარაძემ მიულოცა.

„აჭარის მთავრობის მხარდაჭერით ეკომიგრანტი ოჯახების უსაფრთხო საცხოვრისით უზრუნველყოფა გრძელდება. მიმდინარე წელს უკვე 75 ოჯახმა შეძლო საცხოვრებელი ფართის შეძენა, წლის ბოლომდე კი მათი რაოდენობა 150-მდე გაიზრდება. პროგრამას ეტაპობრივად ვაფართოებთ, წლიდან წლამდე ვნერგავთ სიახლეებს, რათა დაზარალებულ ოჯახებს მეტი ხელმისაწვდომობა ჰქონდეთ. 2025 წელს პროგრამისთვის გათვალისწინებულია 7 740 000 ლარი“, - განაცხადა მინისტრმა, ნინო ნიჟარაძემ.

2025 წელს განხორციელებული სიახლის თანახმად, ბენეფიციარებს საშუალება აქვთ, პროგრამით გათვალისწინებული თანხით, საკუთრებაში რეგისტრირებულ მიწის ნაკვეთებზე, შესაბამისი მუნიციპალიტეტის მიერ გაცემული მშენებლობის ნებართვის საფუძველზე, ააშენოს საცხოვრებელი სახლი.

„მეუღლესთან, შვილთან, რძალთან და ორ მცირეწლოვან შვილიშვილთან ერთად, ხულოს მუნიციპალიტეტის სოფელ პაქსაძეებში ვცხოვრობდი. ბოლო ორი წლის განმავლობაში ჩვენს სახლთან მეწყრული პროცესები გააქტიურდა და განსაკუთრებით უამინდობის დროს შეუძლებელი იყო იქ გაჩერება. პირველ ეტაპზე ხულოს თვითმმართველობას მივმართეთ, შესაბამისი გეოლოგიური დასკვნის საფუძველზე აჭარის ჯანდაცვის პროგრამაში ჩავერთეთ და შევიძინეთ ბინა ქალაქ ბათუმში. მადლობელი ვარ ყველა იმ ადამიანის, ვინც ჩვენს გვერდით იდგა ამ რთულ გზაზე“, - ამბობს პროგრამის მოსარგებლე, ემზარ პაქსაძე.

აჭარის ჯანდაცვის სამინისტროს ინფორმაციით, გასულ წელს, ეკომიგრანტ ოჯახებს შესაძლებლობა მიეცათ, საცხოვრებლად ვარგისი ფართი შეისყიდონ მშენებარე კორპუსშიც. „ეკომიგრანტი ოჯახების საცხოვრებლით უზრუნველყოფის” პროგრამა ამოქმედდა 2016 წელს, ჯამში შეძენილია 934 საცხოვრებელი ფართი, გამოიყო 30 მილიონ 999 942 ლარი.