"არ გაუწიოთ სამედიცინო დახმარება მთავრობის მაღალჩინოსნებს, მოქმედ პრეზიდენტს, პრემიერს, მინისტრთა კაბინეტს..." - საქართველოს კლინიკების ასოციაციის პრეზიდენტის მიმართვა მედიკოსებს

საქართველოს კლინიკების ასოციაციის პრეზიდენტი, მედიცინის დოქტორი ვილი პაჭკორია სოციალურ ქსელში განცხადებას ავრცელებს და საქართველოში მომუშავე ექიმებს მიმართავს.

იგი საქართველოს კლინიკების ასოციაციის სახელით, სხვადასხვა კლინიკების ხელმძღვანელებს და მედიკოსებს ბოიკოტის გამოცხადებისკენ მოუწოდებს, იმ შემთხვევაში, თუ საპატიმროში მყოფ საქართველოს მესამე პრეზიდენტს მიხეილ სააკაშვილს, არ მიეცემა სრულფასოვანი მკურნალობის უფლება.

"კოლეგებო! სანამ მესამე პრეზიდენტს არ მიეცემა შერეული ტიპის პოლიპროფილურ სტაციონარში (ტიპი-C) სრულფასოვანი მკურნალობის უფლება, პროტესტის ნიშნად გამოვაცხადოთ უპრეცედენტო ბოიკოტი და არ გაუწიოთ სამედიცინო დახმარება მთავრობის მაღალჩინოსნებს, მოქმედ პრეზიდენტს, პრემიერს, მინისტრთა კაბინეტისა და პარლამენტის უმრავლესობის წევრებს!!

ჩვენი ვალდებულებაა განსაცდელში მყოფი, ნებისმიერი პაციენტის კვალიფიციური დახმარება და სიცოცხლის შენარჩუნება, მისი პოლიტიკური შეხედულების, რწმენისა და სქესის მიუხედავად!!",-  წერს ვილი პაჭკორია.

საქართველოს მესამე პრეზიდენტი მიხეილ სააკაშვილი 1 ოქტომბერს, თბილისში დააკავეს. იგი სამი ინსტანციის სასამართლოს განაჩენით ცნობილია დამნაშავედ ვალერი გელაშვილის ცემის და სანდრო გირგვლიანის სისხლის სამართლის საქმეებზე და სასჯელის ზომად განსაზღვრული აქვს თავისუფლების აღკვეთა 6 წლის ვადით. აღნიშნულ საქმეებზე სასამართლოს მიერ გამოტანილი გადაწყვეტილებები საბოლოოა და არ საჩივრდება. სააკაშვილი დაკავების დღიდან, 36-ე დღეა შიმშილობს. სააკაშვილის ადვოკატები და პირადი ექიმები მისი ჯანმრთელობის მდგომარეობის დამძიმებაზე საუბრობენ და ყოფილი პრეზიდენტის სამოქალაქო კლინიკაში გადაყვანას ითხოვენ.

🔵 "მოვითხოვ როგორც ექიმი, როგორც მშობელი დღესვე აიძულეთ მთავრობა მიშა გადაიყვანონ მულტიფუნქციურ კლინიკაში" - ნიკოლოზ სააკაშვილი

🔵 „მინდა სიცოცხლე და თავისუფლება“ - მიხეილ სააკაშვილი

🔵 "ჩემი პოზიცია ყოფილი პრეზიდენტის შეწყალებაზე მყარი და უცვლელია, არა და არასოდეს" - სალომე ზურაბიშვილი