გიორგი მშვენიერაძე: ადამიანის უფლებების დარღვევისთვის დასჯილი პოლიციელები ძალიან ცოტანი არიან, ხოლო უკანონო ბრძანების შეუსრულებლობის გამო - ბევრი

„საქართველოს დემოკრატიული ინიციატივის“ (GDI) ხელმძღვანელი გიორგი მშვენიერაძე Facebook-ის საკუთარ გვერდზე პოლიციელის მხრიდან შშმ პირის ცემის ფაქტს ეხმაურება:

"პოლიციელის მიერ დაკავებულის "წამორტყმა" ჩვეულებრივი ამბავია.

დიახ, მათ ჰგონიათ რომ საკუთარი მუჭითა და ძალაუფლებით მუნჯს აალაპარაკებენ.

ადამიანის აბუჩად აგდება, უყურადღებობა, პასუხის ღირსად არ ცნობა, ხომ ყოველდღიურობაა.

ყოველდღიურობაა ცრუ ჩვენებები სასამართლოში, გამოგონილი ბრალდებებით ადამიანების დაკავება ან დაჯარიმება.

"პოლიციის შესახებ" კანონით პოლიციის საქმიანობის სახელმძღვანელო პრინციპები იცით როგორ იწყება?

"პოლიციელი თავის საქმიანობაში განუხრელად იცავს ადამიანის ძირითადი უფლებებისა და თავისუფლებების დაცვისა და პატივისცემის, კანონიერების, დისკრიმინაციის დაუშვებლობის, თანაზომიერების, დისკრეციული უფლებამოსილების განხორციელების, პოლიტიკური ნეიტრალობისა და პოლიციის საქმიანობის გამჭვირვალობის პრინციპებს."

რამხელა ცინიზმია...

ჩვენნაირ ქვეყნებში პოლიციელები იცავენ ბრძანებებს, თუნდაც ეს ბრძანებები ცალსახად უკანონო იყოს, ხოლო კანონი და ადამიანის უფლებები მათთვის მეათეხარისხოვანია.

იმიტომ, რომ კანონის ან ადამიანის უფლებების დარღვევისთვის დასჯილი პოლიციელები ძალიან ცოტანი არიან, ხოლო უკანონო ბრძანების შეუსრულებლობის გამო - ბევრი.

ამას რიგითი პოლიციელების დასჯით არ ეშველება", - წერს მშვენიერაძე.

მედიაში გავრცელდა ვიდეო, რომელიც თბილისის მეტროშია გადაღებული. ვიდეოში ჩანს, როგორ ურტყამს პოლიციელი ახალგაზრდა კაცს, რომელიც გავრცელებული ინფორმაციით, შეზღუდული შესაძლებლობების მქონე პირია.

მოგვიანებით მომხდარს შინაგან საქმეთა სამინისტრო გამოეხმაურა. უწყების განცხადებაში წერია, რომ გენერალურმა ინსპექციამ ფაქტის მოკვლევა უკვე დაიწყო.

ამავე თემაზე:

🔵 შსს: ინსპექტორის სამსახურმა პოლიციელის მხრიდან ძალადობით უფლებამოსილების გადამეტების ფაქტზე გამოძიება სსკ-ის 333-ე მუხლით დაიწყო (ვიდეო)

🔵 "განსაკუთრებით შემზარავი იყო პოლიციელის გვერდით მდგომი კოლეგის გულგრილობა, ვფიქრობ ეს ამ პოლიციელისთვის პირველი შემთხვევა არ იყო" - ნიკა სიმონიშვილი

🔵 „სისტემა, შსს, კანონი და დავალება სჭირდება იმას ასეთი არაკაცი რომ არ იყო რასაც ახლა ეკრანზე ვუყურებთ?“ - თინა ხიდაშელი პოლიციელის მხრიდან მოქალაქის ცემის ფაქტზე