ირაკლი კირცხალია: სასწრაფოდ უნდა დავუბრუნდეთ პრესის თავისუფლების 2012 წლამდე მაჩვენებელს, ჩვენ ეს უნდა შევძლოთ! რაც შეეხება ორგანიზაციას „რეპორტიორი საზღვრებს გარეშე“, ის უნდა გამოცხადდეს ყველაზე ობიექტურ შემფასებლად მსოფლიოში!

ირაკლი კირცხალია სოციალურ ქსელში ორგანიზაციის „რეპორტიორი საზღვრებს გარეშე“ გამოქვეყნებულ ინფორმაციას ეხმაურება, რომელიც საქართველოში მედიის მდგომარეობას ეხება.

ფრაქცია „ქართული ოცნების“ თავმჯდომარე, საპარლამენტო უმრავლესობის ლიდერი თავის მხრივ ქვეყანაში „ნაციონალური მოძრაობის“ ხელისუფლების პერიოდში არსებულ მედიის მდგომარეობას იხსენებს.

„ვფიქრობ, ეს შემაშფოთებელი მაჩვენებელია და სასწრაფოდ უნდა მოვხსნათ გაუგონარი წნეხი მედიაზე. ბოლო დროს მათ შიში და კრიტიკული კითხვებისგან თავშეკავება პირად საუბრებშიც კი აშკარად შეეტყოთ. ასევე, უნდა გაიხსნას ჩვენ მიერ დახურული ყველა მედიასაშუალება, ხოლო ახალი ტელევიზიის გახსნა ნებისმიერი რაიონული პარტიული ოფისიდან გაუსვლელად უნდა გახდეს შესაძლებელი.

ნოდარ მელაძეს და სხვა გმირ, დამოუკიდებელ ჟურნალისტებს უნდა მიეცეთ უფლება, ნებისმიერი პოლიტიკოსი ყოველგვარი განმარტების გარეშე ფანჯრიდან გადააგდონ, ხოლო პოლიტიკოსებს დაუწესდეთ ვალდებულება, ჰაერშივე გასცენ პასუხი ნებისმიერ კითხვას! პარალელურად, ტელეკომპანია „იმედი“ უნდა გადაეცეს „ნაციონალურ მოძრაობას“, „რუსთავი 2” - „ლელოს”, „პოსტივი“ - გვარამიას და „ჯიდიესი“ - გახარიას.

სასწრაფოდ უნდა დავუბრუნდეთ პრესის თავისუფლების 2012 წლამდე მაჩვენებელს, ჩვენ ეს უნდა შევძლოთ! რაც შეეხება ორგანიზაციას „რეპორტიორი საზღვრებს გარეშე“, ის უნდა გამოცხადდეს ყველაზე ობიექტურ შემფასებლად მსოფლიოში!

პ.ს. ყველას ძალიან ვთხოვ, თავი შეიკავონ ისეთი არაევროპული და პროვინციული კომენტარებისგან, როგორიცაა „მაგ სიმართლით იარონ მაგათმა” და სხვა“, - წერს ირაკლი კირცხალია.