ირაკლი კობახიძე: გერმანიის ელჩთან ადამიანები რომ მივიდნენ, ეს ყოფილა დანაშაული, ამავე დროს, მათი დაფინანსებით ხდება მარიამ ლაშხთან მივარდნის გამართლება, ორმაგი სტანდარტია, რაც დაუშვებელია

 დაუშვებელია, ევროპიდან საქართველოში ფინანსდებოდეს სიძულვილის კამპანიები, - ამის შესახებ საქართველოს პრემიერ-მინისტრმა ირაკლი კობახიძემ დეპუტატ მარიამ ლაშხზე თავდასხმასთან დაკავშირებით დასმული კითხვის საპასუხოდ განაცხადა.

მთავრობის მეთაურის შეფასებით, ეს არის არა მარტო ორგანიზებული, არამედ პირდაპირ გარედან დაფინანსებული კამპანია და ამ კამპანიას აწარმოებენ კონკრეტული ადამიანები, რომლებიც ქვეყნის გარედან იღებენ დაფინანსებას.

„ძირითადად ეს არის ევროპული ბიუროკრატიისგან გაცემული ფინანსები. ეს შემაშფოთებელია, დაუშვებელია, ევროპიდან საქართველოში ფინანსდებოდეს სიძულვილის კამპანიები. არასრულწლოვან ბავშვებთან ერთად იყო მარიამ ლაშხი, როდესაც მას მიუვარდნენ რადიკალური ოპოზიციის წარმომადგენლები და აყენებდნენ შეურაცხყოფას. ეს არის კატეგორიულად მიუღებელი.

მინდა შეგახსენოთ, რომ რამდენიმე დღის წინ საგარეო საქმეთა სამინისტროში შემოვიდა გერმანიის საგარეო საქმეთა სამინისტროს ნოტა, სადაც საუბარია იმაზე, რომ როდესაც ელჩთან, ბატონ ფიშერთან მივიდნენ ადამიანები, სხვათა შორის ბევრად უფრო რბილი ფორმით, თურმე ეს ყოფილა სისხლის სამართლის დანაშაული. ამავე დროს, მათი დაფინანსებით ხდება იმ ფაქტის გამართლება, რაც უკავშირდებოდა არასრულწლოვან ბავშვებთან ერთად მყოფ მარიამ ლაშხთან მივარდნას. ეს არის ორმაგი სტანდარტი.

ევროპული ბიუროკრატია არის სრულიად ტრაგიკულ მდგომარეობაში და ეს, რა თქმა უნდა, აისახება მთლიანად ევროკავშირის იმიჯზე ჩვენს ქვეყანაში. არ შეიძლება, ასეთ ტრაგიკულ დონემდე დავიდეს ევროპული ბიუროკრატია, როდესაც ისინი ხელმძღვანელობენ ორმაგი სტანდარტებით, როდესაც მათთვის არ არსებობს არავითარი სამართლიანობის პრინციპი, სამართლის უზენაესობის პრინციპი. იმედი მაქვს, რომ ევროპაში ეს ტრაგიკული მდგომარეობა შეიცვლება“, - აღნიშნა ირაკლი კობახიძემ.