"კახეთიდან კოლონას მაჩალიკაშვილი მოუძღოდა, ახალგაზრდები ცოცხის ქნევით შემოიფარგლნენ, იცოდნენ შვილმკვდარ მამას ელაპარაკებოდნენ" - სოლომონ ნერგაძე

იტალიაში მოღვაწე, ბიოტექნოლოგიების დეპარტამენტის პავიას უნივერსიტეტის მოლეკულური ბიოლოგიის ასისტენტ-პროფესორი სოლომონ ნერგაძე, "ფეისბუკში", თავისუფლების მოედანზე გამართულ "ნაცმოძრაობის" აქციას ეხმაურება. 

"რომ არ ვთქვა, არ შემიძლია:

კახეთიდან მომავალ კოლონას მალხაზ მაჩალიკაშვილი მოუძღოდა თავისი მანქანით.

სიტყვიერი შელაპარაკება მოხდა მასა და მათ წინააღმდეგ განწყობილ ახალგაზრდებს შორის.

მალხაზმა, ჩამოვალო, დაემუქრა ახალგაზრდებს.

ჩამოდიო, ახალგაზრდებმა.

ამის იქით საქმე არ წასულა - მ. მაჩალიკაშვილმა მანქანა დაძრა. ახალგაზრდებმა მანქანას მხოლოდ თვალი გააყოლეს და ხელის და ცოცხის ქნევით შემოიფარგლნენ.

ვერ დავმალავ, ნამდვილად მესიამოვნა. შიგნით, გულში მესიამოვნა. იცოდნენ ბიჭებმა, ნაციონალური მოძრაობს წევრს კი არა, შვილმკვდარ მამას ელაპარაკებოდნენ და ხელის და ცოცხების ქნევის იქით საქმე არ წასულა.

იგივე ბიჭებმა, სხვა მანქანას ცოცხები დაუშინეს.

მაგარი ბიჭები ხართ, ბიჭებო!

ყველაზე გლახა წუთებშიც კი არ კარგავთ კაცობას - ქართული თვისებაა ეგ!
დაგლოცოთ ღმერთმა.

მალხაზ, შენც სიმშვიდე და სიკეთე მოგცეს ღმერთმა, გაგიმარჯოს!

ღმერთმა ქვეყანა დაგვილოცოს, მეგობრებო!

P.S. ძალიან ვთხოვ ყველას, ვინც გამოხმაურებას დააპირებს, ნუ გააფუჭებს ამ განწყობილებას, რა!", - წერს სოლომონ ნერგაძე "ფეისბუკში".

"თავისუფლება მიშას" - ამ სახელწოდებით თავისუფლების მოედანზე, საქართველოს მესამე პრეზიდენტის მიხეილ სააკაშვილის გათავისუფლების მოთხოვნით "ნაცმოძრაობის" ორგანიზებული საპროტესტო აქცია დასრულდა. აქციაზე მიხეილ სააკაშვილის მიმართვა წაიკითხეს. მან მხარდამჭერებს დიდი შერიგებისკენ მოუწოდა. აქციაზე შეკრებილებს, სპეციალურად დამზადებული სცენიდან, პარტიის ლიდერებმა, მერობის კანდიდატებმა და საზოგადოებისთვის ცნობილმა სახეებმა მიმართეს. შეკრებილები მიხეილ სააკაშვილის გათავისუფლებას ითხოვენ.