კონსტანტინე გამსახურდია: უნდა მოხდეს შეთანხმება თუნდაც იმაზე, რა არის ეროვნული ინტერესი. გარკვეული პლატფორმა უნდა შეიქმნას. არ რის საუბარი იმაზე, რომ ყველა ერთ აზრზე დადგება

 ისტორია არ არის მხოლოდ ისტორია, რომელიც სადღაც წარსულში რჩება და მას არანაირი ზემოქმედება არ აქვს აწმყოზე. მისი არსი მუდმივად ზემოქმედებს და ჩამოქნის აწმყოს. აქედან გამომდინარე მომავალსაც, - განაცხადა „დღის ქრონიკაში“ სტუმრობისას კონსტანტინე გამსახურდიამ.

მისივე თქმით, ისტორია გვასწავლის იმას, რამაც დაანგრია საქართველოს დამოუკიდებლობა. მან აღნიშნა, რომ მერაბ კოსტავა და ზვიად გამსახურდია იმსხვერპლა დაპირისპირებამ, სიძულვილმა, გახლეჩამ, რომელიც შემოაგდო საქართველოს სახელმწიფოებრიობისა და კაცობრიობის მტერმა. საუბრისას მან გაიხსენა მერაბ კოსტავას ლექსი - „26 მაისის მტრებს“ და ისაუბრა, დღეს რა გამოწვევების წინაშე დგას საქართველო.

კონსტანტინე გამსახურდიას განცხადებით, ქვეყნის დამოუკიდებლობის აღდგენაში ლომის წილი ასევე აქვს საქართველოს მართლმადიდებელ სამოციქულო ეკლესიას, რომელმაც ქვეყნის დამოუკიდებლობის აღდგენამდე აღადგინა ეკლესიის ავტოკეფალია.

გამსახურდიამ ისაუბრა ბოლო დროინდელ მოვლენებზეც და აღნიშნა, რომ დასავლეთთან ურთიერთობების აღდგენისთვის გამოსავალს გადატვირთვის მიმართულებით ხედავს. „ეს აუცილებლად მიღწევადია. უბრალოდ, ამას სჭირდება მოთმინება და სწორი აქცენტების დასმა, სწორი კონტაქტების აგება“, - დასძინა გამსახურდია.

მისივე თქმით, საზოგადოება უნდა ჩამოყალიბდეს, რა არის ჩვენი ეროვნული ინტერესი.

„უნდა მოხდეს შეთანხმება თუნდაც იმაზე, რა არის ეს ეროვნული ინტერესი. გარკვეული პლატფორმა უნდა შეიქმნას. არ რის საუბარი იმაზე, რომ ყველა ერთ აზრზე დადგება. ყველა ყველაფერში ერთმანეთს დაეთანხმება და იქნება იდეალური ჰარმონია და მტრედების ღუღუნი - ეს ნამდვილად არ იქნება, მაგრამ რაღაცაზე მორიგება შესაძლებელია, მოხდეს. ვფიქრობ, ამაზე უნდა ვიმუშაოთ“, - განაცხადა გამსახურდიამ.

მან ასევე ისაუბრა, თუ რა არის საჭირო იმისთვის, რომ საზოგადოებრივი თანხმობა შედგეს და თავიდან ავიცილოთ დაპირისპირება და სიძულვილი.

„როგორც ავთვისებიანი სიმსივნე, ეს მუდმივად მოქმედებს. რაღაც პერიოდულობით, მუდმივად იგი თავის ნეგატიურ ეფექტს აჩვენებს. ალბათ, ამაზე უნდა გავამახვილოთ ყურადღება. დავანახოთ ადამიანებს, რომ ეს უნდა ნეიტრალიზებული იქნეს, რომ ეს არ შეიძლება მუდმივად დარჩეს. რა საკვირველია, ამას ისტორიის სწორად დანახვა სჭირდება. ეს გვაკლია ჩვენ. ისტორია არ არის სწორად დანახული. უახლესი ისტორია უნდა იყოს სწორად გააზრებული, გაანალიზებული და დანახული“, - განაცხადა გამსახურდიამ.