პაატა სალია: მემორანდუმი მნიშვნელოვანი ნაბიჯია იმისთვის, რომ კიდევ უფრო გახსნილი გახდეს საქართველოს უძრავი ქონების ბაზარი ინვესტორებისთვის, რაც ხელს შეუწყობს ამ სექტორის კიდევ უფრო განვითარებას

საქართველოს იუსტიციის მინისტრმა არაბთა გაერთიანებულ საამიროებში ვიზიტისას მემორანდუმი გააფორმა, რომელიც მიზნად ისახავს საქართველოში უძრავი ქონების ბაზრის ციფრულ ტრანსფორმაციასა და ინვესტიციების მოზიდვას.

„ხელი მოეწერა ურთიერთგაგების მემორანდუმს საქართველოს იუსტიციის სამინისტროსა და Prypco Technologies-ს შორის. ეს ერთ-ერთი მოწინავე კომპანიაა არაბთა გაერთიანებულ საამიროებში, ცნობილი სამშენებლო კომპანია „დამაკის“ (DAMAC) შვილობილი, რომელიც დუბაიში პილოტ პროექტს ახორციელებდა. აღნიშნული პროექტი კი გულისხმობდა უძრავი ქონების ტოკენიზაციას, რამაც მნიშვნელოვნად გაზარდა ინვესტორების რიცხვი დუბაიში“, - განაცხადა იუსტიციის მინისტრმა.

პაატა სალიას თქმით, მემორანდუმი ითვალისწინებს მომავალ თანამშრომლობას, რათა საქართველოშიც დაინერგოს მსგავსი ტექნოლოგია.

„აღნიშნული შესაძლებლობას მისცემს უცხოელ ინვესტორებს, საქართველოში შეიძინონ უძრავი ქონება ტოკენიზაციის საშუალებით. ეს ბევრ წვრილ ინვესტორს საქართველოში ჩამოუსვლელად აძლევს საშუალებას, შეიძინონ საინვესტიციო უძრავი ქონება. ეს არის მნიშვნელოვანი ნაბიჯი იმისთვის, რომ კიდევ უფრო გახსნილი გახდეს საქართველოს უძრავი ქონების ბაზარი უცხოელი ინვესტორებისათვის. ამ მხრივ ძალიან მნიშვნელოვანია იუსტიციის სამინისტროსა და საჯარო რეესტრის როლი, რომ ყველას ინტერესი - როგორც ინვესტორის, ისე ქონების მესაკუთრის - იყოს დაცული“, - აღნიშნა იუსტიციის მინისტრმა.

მინისტრმა ყურადღება გაამახვილა უსაფრთხო და გამჭვირვალე ტრანზაქციების მნიშვნელობაზეც.

„ყველა ტრანზაქცია რეგისტრირდება ბლოქჩეინზე, რაც იძლევა იმის საშუალებას, რომ ყველა ტრანზაქცია იყოს გამჭვირვალე და სანდო. ეს არის ძალიან მნიშვნელოვანი, რათა უძრავი ქონების ბაზარი კიდევ უფრო განვითარდეს საქართველოში“, - განაცხადა იუსტიციის მინისტრმა.