"ქართული ოცნება" უკრაინასთან დაკავშირებით ახალ რეზოლუციაზე მუშაობს

პარლამენტის საპროცედურო საკითხთა და წესების კომიტეტის თავმჯდომარის, ირაკლი ქადაგიშვილის ინფორმაციით, „ქართული ოცნება“ უკრაინასთან დაკავშირებით ახალ რეზოლუციაზე მუშაობს. 

ქადაგიშვილის თქმით, სახეზეა რუსეთის მხრიდან ფართომასშტაბიანი აგრესია სუვერენული სახელმწიფოს წინააღმდეგ.

„ეს პირდაპირ საფრთხეს უქმნის არა მარტო უკრაინას, არამედ მთელ კონტინენტს.

ჩემი პოზიციაა, რომ საქართველოს მხრიდან გადადგმული ყველა ნაბიჯი იყოს ძალიან მჭიდროდ შეთანხმებული ჩვენს დასავლელ პარტნიორებთან.

უნდა გამოვდიოდეთ საქართველოს ინტერესებიდან.

არანაირად არ უნდა მივცეთ საბაბი, რომ რუსეთს თავისი აგრესიის საქართველოზე გავრცელების საშუალება მიეცეს.

გამომდინარე აქედან, ყველა განცხადება და რეზოლუცია, რომელსაც, სხვათა შორის, ჩვენც ვამზადებთ, უნდა იყოს აცდენილი ესკალაციის გადმოტანას საქართველოში. 

ერთი ძალიან საგანგაშო სიგნალი გეგმის შესაძლო განხორციელების შესახებ უკვე გაცხადებული იქნა, როდესაც ბიბილოვმა, ე.წ. თვითგამოცხადებული რეჟიმის წარმომადგენელმა განაცხადა, რომ ვიწყებთ მზადებას, რათა შესაძლო ქართული პროვოკაციებისგანაც დავიცვათ თავიო“, – განაცხადა ქადაგიშვილმა.

უკრაინაში რუსეთის სამხედრო აგრესიის დაწყების შემდეგ, საპარლამენტო ოპოზიციამ პრეზიდენტს მიმართა და უკრაინის საკითხზე სამსჯელოდ პარლამენტის რიგგარეშე სხდომის მოწვევა მოითხოვა.

სხვა სიახლეები:

🔳 ოკუპირებულმა სოხუმმა დონბასიდან 93 ევაკუირებული ადამიანი მიიღო

🔳 18 ილ-76 თვითმფრინავი კიევის მიმართულებით აფრინდა

🔳 ჩერნიგოვის მახლობლად 74-ე რუსული მოტომსროლელი ბრიგადის სადაზვერვო ოცეული ჩაბარდა

🔳 "უკრაინაში ჩვენი ქვეყნის ბედი წყდება" - ბაია პატარაია