"სააკაშვილი უნდა გასამართლდეს, მაგრამ მოვუწოდებთ "ნაცმოძრაობას", რომ დაუყონებლივ მიმართონ სტრასბურგის სასამართლოს სააკაშვილის სამოქალაქო კლინიკაში გადაყვანის მოთხოვნით" - ანა დოლიძე

პარტია "ხალხისთვის" ლიდერი ანა დოლიძე „ნაციონალურ მოძრაობას“ მოუწოდებს, მიხეილ სააკაშვილის სამოქალაქო კლინიკაში გადაყვანის მოთხოვნით სტრასბურგის სასამართლოს მიმართონ.

მისი თქმით, ჯანმრთელობის მდგომარეობასთან დაკავშირებულ განცხადებებს სტრასბურგის სასამართლო დაჩქარებულად განიხილავს.

"მივიჩნევთ, რომ სააკაშვილი უნდა გასამართლდეს, მაგრამ მას ამავე დროს უნდა ჰქონდეს დაცული, ჯანმრთელობისა და სიცოცხლის უფლება, აქედან გამომდინარე, მოვუწოდებთ „ნაციონალურ მოძრაობას“ დაუყონებლივ გამოიყენოს ევროპის ადამიანთა კონვენციის 39-ე მუხლით უზრუნველყოფილი დროებითი პროცედურა, მიმართოს სტრასბურგის სასამართლოს და მოითხოვოს სააკაშვილის გადაყვანა მისი მოთხოვნის შესაბამისად, სამოქალაქო საავადმყოფოში.

39-ე მუხლით დადგენილი დროებითი პროცედურით სტრასბურგის სასამართლო დაუყოვნებლივ იხილავს საკითხებს, როდესაც საქმე ეხება ჯანმრთელობას, სიცოცხლესა და გადარჩენის საკითხებს.

ჩვენ შეგვიძლია, გვქონდეს იმედი, ადრე, როგორც „რუსთავი 2“-ის საქმეში, სტრასბურგის სასამართლო დაუყოვნებლივ განიხილავს ადვოკატების ამ მიმართვას და გამოიტანს გადაწყვეტილებას გადაიყვანონ თუ არა მიხეილ სააკაშვილი სასწრაფოდ სამოქალაქო საავადმყოფოში მისი სიცოცხლისა და ჯანრთელობის დასაცავად", – განაცხადა ანა დოლიძემ.

საქართველოს მესამე პრეზიდენტი მიხეილ სააკაშვილი 1 ოქტომბერს, თბილისში დააკავეს. იგი სამი ინსტანციის სასამართლოს განაჩენით ცნობილია დამნაშავედ ვალერი გელაშვილის ცემის და სანდრო გირგვლიანის სისხლის სამართლის საქმეებზე და სასჯელის ზომად განსაზღვრული აქვს თავისუფლების აღკვეთა 6 წლის ვადით. აღნიშნულ საქმეებზე სასამართლოს მიერ გამოტანილი გადაწყვეტილებები საბოლოოა და არ საჩივრდება. სააკაშვილი დაკავების დღიდან, 26-ე დღეა შიმშილობს.

ასევე დაგაინტერესებთ:

🔵 "სააკაშვილის დაპატიმრებას საქართველოში არაადეკვატური რეაგირება მოჰყვა ერთი მხრივ, მედიასაშუალებებში, მეორე მხრივ, უფლებადამცველების მხრიდან" - ნანა კაკაბაძე

🔵 "პატიმრის კერძო კლინიკაში გაყვანა მხოლოდ პატიმრის სურვილზეა დამოკიდებული? განსაკუთრებულ სტატუსსა და რეჟიმს არც ერთი პატიმარი არ იმსახურებს" - მიხეილ სარჯველაძე

🔵  სააკაშვილი ჰიტლერს ყველაფერში ბაძავს, როდესაც ჰიტლერი ციხეში პირველად ჩასვეს, მანაც შიმშილობა დაიწყო - ირაკლი ღარიბაშვილი