საგარეო უწყება, ბათუმის ტრაგედიასთან დაკავშირებით საერთაშორისო საზოგადოებას, თანაგრძნობისთის მადლობას უხდის

საქართველოს საგარეო საქმეთა სამინისტრო ბათუმში საცხოვრებელი კორპუსის ჩამონგრევის გამო მიღებული თანაგრძნობისთვის საერთაშორისო საზოგადოებას მადლობას უხდის.

უწყება განცხადებას "ტვიტერზე" ავრცელებს.

„ჩვენ ძალიან ვაფასებთ ჩვენი საერთაშორისო პარტნიორებისა და მეგობრების მხარდაჭერას, რომელიც ბათუმში დატრიალებული ტრაგედიის შემდეგ გამოხატეს, სადაც საცხოვრებელი სახლის ჩამონგრევას 9 ადამიანის სიცოცხლე შეეწირა. მთელი საქართველო გლოვობს შემზარავი ინციდენტის მსხვერპლებს. დიდი მადლობა ყველას თბილი სიტყვებისთვის", – ნათქვამია საგარეოს სამადლობელ წერილში.

ბათუმში, 26 მაისის ქუჩაზე, საცხოვრებელი კორპუსის სადარბაზო 8 ოქტომბერს, დაახლოებით, 12:00 საათზე ჩამოინგრა. შინაგან საქმეთა სამინისტრომ ბათუმში საცხოვრებელი კორპუსის ნგრევის ფაქტზე მიმდინარე გამოძიების ფარგლებში სამი პირი დააკავა.

ბათუმში მომხდარ ტრაგედიას სულ 9 ადამიანის სიცოცხლე ემსხვერპლა, მათ შორის სამი მცირეწლოვანია.

ნგრევას ერთადერთი ცოცხლად გადარჩენილი პირი კლინიკაში რჩება, 36 წლის კაცი კონტაქტურია. ექიმების შეფასებით მისი მდგომარეობა მძიმე, თუმცა სტაბილური.

პრემიერ-მინისტრ ირაკლი ღარიბაშვილის ინიციატივით, დაღუპულთა ხსოვნის პატივსაცემად, ორშაბათი, 11 ოქტომბერი გლოვის დღედ გამოცხადდა.