„სანდროს გაყინულ ტბაზე სრიალისას ყინული ჩაუტყდაო“ - ნათია ფანჯიკიძე ყრუ-მუნჯი ბავშვის ისტორიას იხსენებს

ფსიქოლოგი, ფსიქოსოციალური დახმარების ცენტრ “კამარას” დამფუძნებელი ნათია ფანჯიკიძე, გუშინ ყრუ-მუნჯი ახალგაზრდის, პოლიციელის მხრიდან ფიზიკური ანგარიშსწორების ფაქტს ეხმაურება და სოციალურ ქსელში წერილს აქვეყნებს. 

„გამხეცებული პოსტი დავწერე გუშინ პოლიციელზე, ციხიდან ცხვირი არასდროს გამოყოსმეთქი. გამოვუშვი ბრაზი და ცოტა ხანში ჩემი პოსტი ისევ რომ შემომხვდა, ისე უსიამოვნო იყო, მივმალე.

უხსოვარ დროს, ბავშვთა სახლში რომ ვმუშაობდი, პატარა მუნჯი ბიჭი გვყავდა ერთი, სანდრო. „ჟღვლინტიანი“ ბავშვები ხომ გინახავთ, ნებისმიერ ამინდში, სულ რომ ცხვირიდან მოსდით, - ასეთი იყო. ყოველ დილას, ეზოს კართან მელოდა და რომ მხედავდა, სიხარულისგან ყვირილი უნდოდა, მაგრამ ხმა არ ამოსდიოდა. მაინც მესმოდა მისი "ხმა". ისეთ დიდ პირს აღებდა, ნიკაპი მკერდზე ებჯინებოდა და გაფართოებული, განათებული თვალებით მორბოდა ჩასახუტებლად და მერეც, მთელი დღე გულზე მყავდა აკრული. სახლში რომ ვბრუნდებოდი, ტანსაცმელზე ლოკოკინას ვერცხლისფერი ნაკვალევივით მქონდა მიხატული მისი „ჟღვინტები“.

უკვე ნიუ იორკში ვცხოვრობდი, ბავშვებს რომ ჩვეულებისამებრ მოსაკითხად დავურეკე და მითხრეს, სანდრო ცოტა ხნით სოფელში, სახლში წაიყვანეს და გაყინულ ტბაზე სრიალისას ყინული ჩაუტყდაო.

ჩემს ყველაზე ღრმა ტრავმათაგან ეს ტრავმა ერთ-ერთია და ჩემს ყველაზე მკაფიოდ ჩაბეჭდილ სურათებს შორის, სანდროს სახე ერთ-ერთი ყველაზე კაშკაშა. ერთადერთი, რის მოგონებაც არ შემიძლია, მისი ხმაა, რომელიც არასდროს ამოუღია. რა დროც არ უნდა გავიდეს, ეს სახე ჩემთანაა და ყველგან, სადაც ლოკოკინას ვერცხლისფერ კვალს ვხედავ, ჩემთან ბრუნდება. ამ დროს მონატრებას და მთელ სხეულში საშინელებას ერთად ვგრძნობ, რის გამოთქმაც შეუძლებელია.
ჰოდა ციხიდან ცხვირი არ გამოყოს დროზე ადრე მაგ სადისტმა.“ - წერს ნათია ფანჯიკიძე.

ამავე თემაზე:

📌 დაკავებულია 2 პოლიციელი - ძალადობა შშმ პირზე

📌 "არ ვართ ჩვენ თავმოყვარე საზოგადოება, როცა ჯერ კიდევ ბედავს ვიღაც ასეთს და ალბათ, რამდენ დაუფიქსირებელ "ასეთს" - ლაშა ზარგინავა შშმ პირის ცემის ფაქტზე

📌 ტრამვირებულია, დაზიანებები აღენიშნება - როგორია ბიჭის მდგომარეობა, რომელიც პოლიციელმა სასტიკად სცემა

📌 შსს: ინსპექტორის სამსახურმა პოლიციელის მხრიდან ძალადობით უფლებამოსილების გადამეტების ფაქტზე გამოძიება სსკ-ის 333-ე მუხლით დაიწყო (ვიდეო)