შალვა პაპუაშვილი პარტიების აკრძალვაზე: ჩვენი მთავარი სამიზნე არიან ის პოლიტიკური პარტიები, რომლებიც არიან მთავარი გამწევი ძალა ანტიქართული და ანტიკონსტიტუციური ქმედებებისა. ვისაც აქვს შესაძლებლობა, რომ აურიოს სიტუაცია საქართველოში

პარტიის აკრძალვის კონსტიტუციურობასა თუ ანტიკონსტიტუციურობაზე როდესაც ვსაუბრობთ, ეს ყოველთვის იყო ჩვენს კონსტიტუციაში და ნებისმიერ ქვეყანაში არის, - განაცხადა საქართველოს პარლამენტის თავმჯდომარემ შალვა პაპუაშვილმა პარტიების აკრძალვასთან დაკავშირებით საუბრისას.

მისივე თქმით, წარსულში ნინო ლომჯარია საკონსტიტუციო სარჩელით თავად ითხოვდა ერთი კონკრეტული პარტიის არაკონსტიტუციურად გამოცხადებას.

„ლომჯარიამ მაშინ პარლამენტში ოპოზიციურ წევრებსაც კი გაუგზავნა ის სარჩელი იმისთვის, რომ მათ შეეტანათ. თავად ენჯეოებს ჰქონდათ გამზადებული სარჩელი და ცდილობდნენ მაშინდელ პარტიებთან მუშაობას იმისთვის, რომ მათ შეეტანათ ეს სარჩელი. ფარისევლობა, ტყუილი და ქართველი ხალხის კიდევ ერთხელ გაბრიყვების მცდელობაა, როდესაც უცხოეთიდან დაქირავებული ჯგუფები ცდილობენ რაღაც აბსურდული სამართლებრივი განმარტება გააკეთონ“, - აღნიშნა შალვა პაპუაშვილმა.

პარლამენტის თავმჯდომარემ საკონსტიტუციო სარჩელზეც ისაუბრა და განმარტა, რომ სარჩელი მზად არის და მიმდინარეობს მისი სამართლებრივი დახვეწა.

„დღეს გვექნება უმრავლესობის სხდომა და მოხდება ამ სარჩელის განხილვა. ვფიქრობ, რომ ხვალ უკვე მზად იქნება იმისთვის, რომ შევიტანოთ.

ვხედავთ, რომ არსებობს პარტიები, რომლის გამოყენებაც ხდება იმისთვის, რომ დააზიანონ საქართველო, დააორგანიზონ ხელისუფლების არადემოკრატიული გზით შეცვლა, ვხედავდით ომის პროპაგანდას, ჩვენი ტერიტორიული მთლიანობის ხელყოფის მცდელობას და ა.შ. საკითხები, რომელიც კონსტიტუციითვე არის გაწერილი, რა შემთხვევაში შეიძლება პარტია აიკრძალოს და გამოცხადდეს არაკონსტიტუციურად.

ჩვენი მთავარი სამიზნე არიან ის პოლიტიკური პარტიები, რომლებიც არიან მთავარი გამწევი ძალა ანტიქართული და ანტიკონსტიტუციური ქმედებებისა. ვისაც აქვს რეალური შესაძლებლობა, რომ აურიოს სიტუაცია საქართველოში, დააორგანიზოს ანტიკონსტიტუციური ქმედებები, ხელისუფლებების დამხობის მცდელობები, რომელიც რამდენიმე ვიხილეთ ბოლო 13 წლის განმავლობაში“, - განმარტა შალვა პაპუაშვილმა.

საქართველოს პარლამენტის თავმჯდომარემ ასევე აღნიშნა, რომ ბოლო საკანონმდებლო ცვლილებებით შეიქმნა დასავლური სტილის კანონმდებლობა, რომელიც ეფუძნება თავდაცვისუნარიანი დემოკრატიის პრინციპს.

„თავდაცვისუნარიანი დემოკრატიის პრინციპი გულისხმობს, რომ დემოკრატიამ თავი უნდა დაიცვას დემოკრატიის მტრებისგან, რომლებიც ცდილობენ დემოკრატიული ინსტრუმენტები გამოიყენონ დემოკრატიის წინააღმდეგ. ამ პრინციპით მოქმედებს ყველა ქვეყანა, ეს ჩვეულებრივი პრაქტიკაა მათთვის.

თუკი აინტერესებთ პარტიების აკრძალვა რამდენად კონსტიტუციურია, მიმართონ ნინო ლომჯარიას და ის გაუწევს მათ კონსულტაციას“, - დასძინა შალვა პაპუაშვილმა.