შშმ პირთა უფლებების დაცვის დღეს, საქართველოს პრეზიდენტი დოკუმენტური ფილმის - „უსაზღვრო შესაძლებლობების“ პრეზენტაციას დაესწრო

შშმ პირთა უფლებების დაცვის დღეს, საქართველოს პრეზიდენტი მიხეილ ყაველაშვილი, პარალიმპიური კომიტეტის მოწვევით, საქართველოს პრემიერ-მინისტრთან, პარლამენტის თავმჯდომარესა და სპორტის მინისტრთან ერთად დოკუმენტური ფილმის - „უსაზღვრო შესაძლებლობების“ პრეზენტაციას დაესწრო.

კინოჩვენების დასრულების შემდეგ კი მან დამსწრე საზოგადოებას სიტყვით მიმართა:

„პირველ რიგში გილოცავთ შეზღუდული შესაძლებლობების მქონე პირთა უფლებების დაცვის დღეს. დღეს, საქართველოს პარალიმპიური კომიტეტის ორგანიზებით გამართულ ამ შესანიშნავ ღონისძიებაზე ჩვენი ერთად ყოფნით კიდევ ერთხელ მკაფიოდ ვადასტურებთ, რომ შშმ პირთა უფლებების დაცვა და მათი პოტენციალის სრული რეალიზების ხელშეწყობა სახელმწიფოს მტკიცე პრიორიტეტია.

ნებისმიერი საზოგადოების პროგრესისა თუ ცივილიზებულობის ერთ-ერთი საზომი სწორედ ისაა, თუ როგორ გარემოს ვუქმნით მათ, ვინც ყოველდღიურად ამტკიცებს, რომ ადამიანის ნებასა და სულისკვეთებას საზღვრები არ გააჩნია. ამ უსაზღვრო შესაძლებლობების საუკეთესო მაგალითი კი სწორედ თქვენ - ჩვენი პარალიმპელი სპორტსმენები ბრძანდებით.

თქვენი მიღწევები დარწმუნებული ვარ მხოლოდ დასაწყისია, რადგან ჩვენი სპორტსმენები არასოდეს ნებდებიან, წინ კიდევ უფრო ბევრი გამარჯვება გველის. თქვენ ხართ სამაგალითონი ჩვენი მომავალი თაობებისთვის - თითოეული თქვენი წარმატება უდიდესი სტიმულია ქვეყნისთვის და თითოეულ ქართველში უსაზღვრო სიამაყის განცდას ბადებს.

სპორტული მწვერვალების დაპყრობა მხოლოდ ერთი ნაწილია - შშმ პირთა სრულფასოვანი ინტეგრაცია და მათი უფლებების დაცვა გაცილებით ფართო, სისტემურ მიდგომას მოითხოვს. ეს არის ყოველდღიური, თანმიმდევრული მუშაობა იმისათვის, რომ ქვეყანაში მათთვის ნებისმიერი ფიზიკური და სოციალური ბარიერი აღმოიფხვრას. ჩვენი მიზანია შევქმნათ გარემო, სადაც თითოეულ შშმ პირს ექნება თანაბარი წვდომა ხარისხიან განათლებაზე, დასაქმებასა და სრულფასოვან საზოგადოებრივ ცხოვრებაზე“, - აღნიშნა პრეზიდენტმა