სოზარ სუბარი: კანონის უზენაესობა არის სამართლებრივი სახელმწიფოს მთავარი ნიშანი. სახალხო დამცველი, რომელიც იცავს ადამიანის უფლებებს, უპირველეს ყოვლისა მოვალეა, რომ კანონის უზენაესობისკენ და დაცვისკენ მოუწოდოს ყველას

კანონის უზენაესობა არის სამართლებრივი სახელმწიფოს მთავარი ნიშანი. სახალხო დამცველი, რომელიც იცავს ადამიანის უფლებებს, უპირველეს ყოვლისა მოვალეა, რომ კანონის უზენაესობისკენ და დაცვისკენ მოუწოდოს ყველას, - განაცხადა გადაცემაში „იმედი LIVE“ პარლამენტის ვიცე-სპიკერმა და „ხალხის ძალის“ თავმჯდომარე სოზარ სუბარმა.

„დღეს ჩვენ ვხედავთ არეულობას ლოს ანჯელესში და ამერიკის სხვა ქალაქებში და ვხედავთ შეერთებული შტატების ხელისუფლების პასუხს. არავის არ აქვს უფლება პოლიციელს ესროლოს ფეიერვერკი, ეს არის დასჯადი და ამან შეიძლება გამოიწვიოს ადამიანის დაზიანება და სიკვდილი. ამის გამო ძალიან მკაცრი პასუხისმგებლობა იქნება. ტრამპი პირდაპირ გამოვიდა და თქვა, რომ ისინი აკრძალავენ ნიღბების ტარებას მიტინგებზე ის, რაც ჩვენ მივიღეთ რამდენიმე თვის წინ.

ჩვენ როცა გვაკრიტიკებდნენ, რომ ეს არის არადემოკრატიული, აღმოჩნდა, რომ არავინ არ ამბობს, რომ ეს არის არადემოკრატიული შეერთებულ შტატებში. წარმოუდგენელია ორი სხვადასხვა სტანდარტი არსებობდეს დემოკრატიის. შტატებში იყოს სხვა და საქართველოში იყოს სხვა.

ჩვენ როცა მივიღეთ ეს ცვლილება, მაშინ ჩვენ გადმოვიღეთ ევროპის ძალიან ბევრი ქვეყნის გამოცდილება, სადაც კატეგორიულად არის აკრძალული სახის დაფარვა. სასამართლოს კანონის უზენაესობა არის მთავარი პრინციპი. თუ ვინმემ დაარღვია, ის აგებს პასუხს და თუ ვინმემ არ დაარღვია ის დარწმუნებული იყავით, რომ მოიგებს ეროვნულ სასამართლოს და თუ ეროვნულ სასამართლოში რაღაც პრობლემა შეიქმნა, ადამიანის უფლებათა ევროპული სასამართლო არსებობს იმისთვის, რომ მსგავსი სავარაუდო ხარვეზები გამოასწოროს.

ჩვენ ვნახეთ, რომ ამ წლების გამავლობაში ყველა ის თემა, რასაც პოლიტიკურად მოტივირებული დაარქვა ქართულმა ოპოზიციამ და მათმა უცხოელმა პატრონებმა, ყველა ის ადამიანი, ვისაც უწოდეს პოლიტპატიმარი, ადამიანის უფლებათა ევროპულმა სასამართლომ პირდაპირ თქვა, რომ საქართველოს სასამართლოების გადაწყვეტილება იყო აბსოლუტურად სამართლიანი და კანონიერი და შესაბამისი ადამიანის უფლებათა ევროპულ კონვენციასთან“, - აღნიშნა სოზარ სუბარმა.