“სწორია უკრაინას რომ ვგულშემატკივრობთ, მაგრამ არ გვინდა საკუთარ თავზე ისე საუბარი, თითქოს ჩვენ რუსების შიშით ჩასვრილები ვართ” - ტორესა მოსი

მწერალი ტორესა მოსი, უკრაინაში განვითარებულ მოვლენებსა და ქართული საზოგადოების მხრიდან აღტყინებულ დამოკიდებულებას ეხმაურება, რომელიც მწერლის აზრით, გარკვეული კუთხით, დამამცირებელი და უსამართლოა ქართველებისთვის: 

"არ გვინდა ეს თვითგვემა. რა თქმა უნდა სწორია რომ ვგულშემატკივრობთ უკრაინას, რა თქმა უნდა გვინდა რომ მან მოახერხოს თავის დაცვა, რა თქმა უნდა კარგია, რომ მათ შორის ბევრი მოხალისეა, რა თქმა უნდა საკუთარი ქვეყნისთვის უნდა იბრძოლონ, მაგრამ ეს ნიშნის მოგებით ლაპარაკი რა ჯანდაბაა.

ჩვენ სამჯერ ვიომეთ რუსეთთან სრულმასშტაბიანი ომით, არც მოხალისეების ნაკლებობა ყოფილა და არც რამე დაგვიკლია. ჩვენ ვართ 3.5 მილიონი, უკრაინა არის 50 მილიონი. ჩვენ ორი ტერიტორია გვაქვს ოკუპირებული, უკრაინის ყირიმი კიდევ პირდაპირ მიიერთა რუსეთმა და თან ისე რომ ტყვიაც არ გავარდნილა.

ჰოდა, არ არის საჭირო საკუთარ თავზე ასე ლაპარაკი, გეგონება არიქა და ჩვენ რუსების შიშით ჩასვრილები ვართ. სადაც საომარი იყო, ყველგან ვიომეთ, ვერ მოვიგეთ, მაგრამ დადგება ეგ დღეც, როცა მოვიგებთ.

ახლა უკრაინას ამერიკა და ბრიტანეთი იარაღით ამარაგებს. ჩვენ საზღვრებთან რომ იდგნენ რუსები და ვეუბნებოდით თავს უნდა დაგვესხანო, არ დაგვიჯერეს და იარაღი არ მოგვყიდა არავინ, ჰაერსაწინააღმდეგო თავდაცვის სისტემების გარეშე დაგვტოვეს და ბოდიში რომ ვერ მოვიგეთ, მაგრამ არავისზე ნაკლები არ გვიომია. მეზიზღება ეს თვითგვემა და დემორალიზება. ბევრი ნაკლი გვაქვს, მაგრამ ჩვენი საომარი ნამდვილად ყოველთვის გვიომია."