სუსი "ნაცმოძრაობის" აქციაზე: გეგმავენ გარკვეული სახელმწიფო დაწესებულებების პიკეტირებას, ასევე აქტიურად განიხილავენ ერთ-ერთი ოპოზიციური ლიდერის ლიკვიდაციის შესაძლებლობასაც

"აქციის ორგანიზატორები გეგმავენ გარკვეული სახელმწიფო დაწესებულებების პიკეტირებას, ასევე აქტიურად განიხილავენ ერთ-ერთი ოპოზიციური ლიდერის ლიკვიდაციის შესაძლებლობასაც" ,- ამის შესახებ სახელმწიფო უსაფრთხოების სამსახურის კონტრტერორისტული ცენტრის უფროსის მოადგილემ, ბაჩა მგელაძემ უწყებაში გამართულ ბრიფინგზე განაცხადა.

სუსის კონტრტერორისტული ცენტრის ინფორმაციით, ქმედებები რომელთა მზიანია ხელისუფლების ძალადობრივი გზით დამხობა, იგეგმება მსჯავრდებულ მიხეილ სააკაშვილის მიერ.

როგორც სუსში განაცხადეს, სახელმწიფო უსაფრთხოების სამსახური ყველაფერს გააკეთებს, რომ მსგავსი ქმედებები იქნეს აღკვეთილი, ხოლო დამნაშავეები კანონის შესაბამისად დასჯილი.

"მიმდინარე წლის 6 ნოემბრიდან, ცალკეულ პოლიტიკურ ჯგუფებს, რუსთავის მე-12 პენიტენციურ დაწესებულებასთან განზრახული აქვს, პერმანენტული აქციების ორგანიზება, სადაც დაგეგმილია პარტიის მხარდამჭერების ჩამოყვანა რეგიონებიდანაც, გარდა ამისა საპროტესტო აქცია დაგეგმილია ქალაქ თბილისშიც.

ოპერატიული ინფორმაციით, აქციის ორგანიზატორები გეგმავენ გარკვეული სახელმწიფო დაწესებულებების, კერძოდ: საქართველოს პარლამენტის, საქართველოს მთავრობის ადმინისტრაციის, საქართველოს პრეზიდენტის ადმინისტრაციის, საქართველოს იუსტიციის სამინისტროს, საქართველოს შინაგან საქმეთა სამინისტროს ბლოკირებას და პენიტენციურ დაწესებულებასთან მისასვლელი გზების გადაკეტვას, ამ დაწესებულებების ყოველდღიური სამუშაო რეჟიმის ხელშეშლის მიზნით.

სიტუაციის მაქსიმალური ესკალაციისა და სხვადასხვა პროვოკაციული ქმედებების ორგანიზების უზრუნველსაყოფად, აქციაში დაგეგმილია ძალოვანი სტრუქტურების ყოფილი თანამშრომლების ჩართვა.

ასევე, აქციის ორგანიზატორები აქტიურად განიხილავენ ძალოვანი სტრუქტურის ცალკეული თანამშრომლების გადაბირებისა და ერთ-ერთი ოპოზიციური ლიდერის ლიკვიდაციის შესაძლებლობასაც. 

აღნიშნული ქმედებები რომელთა მზიანია ხელისუფლების ძალადობრივი გზით დამხობა, იგეგმება მსჯავრდებულ მიხეილ სააკაშვილის მიერ, რომელიც პენიტენციურ დაწესებულებაში მის სანახავად შესულ პირებთა მეშვეობით აძლევს დირექტივებს სხვადასხვა ოპოზიციური პარტიის ლიდერებს.

სახელმწიფო უსაფრთხოების სამსახური კანონის შესაბამისად მიიღებს ზომებს დანაშაულის პრევენიციისა და დანაშაულის აღკვეთისათვის,დამნაშავეები კი უმკაცრესად აგებენ პასუხს", - განაცხადა ბაჩა მგელაძემ.

დღეს გაერთიანებული ოპოზიცია რუსთავის ციხესთან საპროტესტო აქციას 18:00 საათზე გამართავს. როგორც "ნაციონალური მოძრაობის" თავმჯდომარე ნიკა მელიამ განაცხადა, ისინი არ დაიშლებიან მანამ, სანამ მიხეილ სააკაშვილს არ გაათავისუფლებენ პატიმრობიდან.

საქართველოს მესამე პრეზიდენტი მიხეილ სააკაშვილი 1 ოქტომბერს, თბილისში დააკავეს. იგი სამი ინსტანციის სასამართლოს განაჩენით ცნობილია დამნაშავედ ვალერი გელაშვილის ცემის და სანდრო გირგვლიანის სისხლის სამართლის საქმეებზე და სასჯელის ზომად განსაზღვრული აქვს თავისუფლების აღკვეთა 6 წლის ვადით. აღნიშნულ საქმეებზე სასამართლოს მიერ გამოტანილი გადაწყვეტილებები საბოლოოა და არ საჩივრდება. სააკაშვილი დაკავების დღიდან, 37-ე დღეა შიმშილობს. სააკაშვილის ადვოკატები და პირადი ექიმები მისი ჯანმრთელობის მდგომარეობის დამძიმებაზე საუბრობენ და ყოფილი პრეზიდენტის სამოქალაქო კლინიკაში გადაყვანას ითხოვენ.

ამავე თემაზე:

"დღეს მოუთმენლად ველი ბევრი ადამიანის ხმის გაგონებას რუსთავში" - მიხეილ სააკაშვილი