თორნიკე ჭეიშვილი: მას შემდეგ, რაც საკონსტიტუციო სასამართლოს მეშვეობით აიკრძალება ეს პარტიები, ეს იქნება გარკვეული პრევენციული ეფექტის მომტანი ნებისმიერი სხვა ექსტრემისტული დაინტერესების მქონე ძალისთვის

როდესაც პოლიტიკური ველი არის ფაქტობრივად ოკუპირებული „კოლექტიური ნაცმოძრაობის“ ხელში, ეს ართულებს იმ შესაძლებლობას, რომ პარალელურად გაჩნდნენ სერიოზული ოპოზიციური ძალები, რომლებიც მათ ჩაანაცვლებენ, - განაცხადა გადაცემაში „დღის ქრონიკა“ იურიდიულ საკითხთა საპარლამენტო კომიტეტის თავმჯდომარის პირველმა მოადგილემ თორნიკე ჭეიშვილმა საკონსტიტუციო სარჩელზე საუბრისას.

მისივე თქმით, საჭიროა, რომ მოხდეს პოლიტიკური წრეების იმ ძალებისგან გაწმენდა, რომლებიც არ არიან თანხვედრაში კონსტიტუციურ ნორმებთან და ყველაფერს აკეთებენ რომ მოხდეს კონსტიტუციური წესწყობილების ხელყოფა.

„ჩვენ გვაქვს საფუძვლიანი ვარაუდი, რომ მოხდება საკონსტიტუციო სარჩელის დაკმაყოფილება, ამის შემდგომ გვაქვს იმის მოლოდინი, რომ სახელმწიფოებრივად მოაზროვნე, ჯანსაღი პოლიტიკური ძალები შემოვლენ პოლიტიკურ ავანსცენაზე და შეეცდებიან, რომ შემოვიდნენ ოპონირებაში მმართველ პოლიტიკურ ძალასთან.

ექსტრემისტული მისწრაფებები გახდა ერთ-ერთი მნიშვნელოვანი საფუძველი იმისა, რომ კონკრეტული პოლიტიკური პარტიები მოხვედრილიყვნენ ამ სარჩელში. მას შემდეგ, რაც საკონსტიტუციო სასამართლოს მეშვეობით აიკრძალება ეს პარტიები, ეს იქნება გარკვეული პრევენციული ეფექტის მომტანი ნებისმიერი სხვა მსგავსი დაინტერესების მქონე ძალისთვის“, - აღნიშნა თორნიკე ჭეიშვილმა.

იურიდიულ საკითხთა საპარლამენტო კომიტეტის თავმჯდომარის პირველმა მოადგილემ განმარტა, რომ შესაძლოა სხვა პოლიტიკურ პარტიებსაც აქვს მსგავსი არაკონსტიტუციური განწყობები, თუმცა რადგან ისინი არ წარმოადგენენ რეალურ საფრთხეს საზოგადოებისთვის, არ მოხვდნენ ასაკრძალი პარტიების სიაში.

თორნიკე ჭეიშვილმა ასევე ისაუბრა პარტიაზე „გახარია საქართველოსთვის“ და აღნიშნა, რომ გახარიას პარტიამ ფაქტობრივად თავი გადაირჩინა ასაკრძალი პარტიების სიაში მოხვედრისგან.

„ბოლო მომენტში შეიცვალა ვითარება და ერთ-ერთი მნიშვნელოვანი სამართლებრივი არგუმენტი, რაც იქნებოდა მათ წინააღმდეგ საკონსტიტუციო სასამართლოში დავის წარმოების საფუძველი, აღარ არის აქტუალური. ისინი პარლამენტში აქტიურ პოლიტიკურ საქმიანობას ახორციელებენ უკვე რამდენიმე დღეა. გახარიას პარტიამ ფაქტობრივად თავი გადაირჩინა შესაბამის პროცესში მონაწილეობისგან.

ეს იმას არ ნიშნავს, რომ ისინი პოლიტიკური პასუხისმგებლობისგან თავისუფლდებიან და არც იმას ნიშნავს, რომ კონკრეტული ფიგურები ამ პარტიაში შესაბამისი ინდივიდუალური სამართლებრივი პასუხისმგებლობისგან არიან დაცული“, - დასძინა თორნიკე ჭეიშვილმა.