"უგულავას განცხადება იყო კატასტროფა, ვგმობ და არ ვეთანხმები" - ელენე ხოშტარია

"დროას" ლიდერმა, ელენე ხოშტარიამ "ნაცმოძრაობის" ერთ-ერთი ლიდერის გიგი უგულავას განცხადება დაგმო.

ხოშტარიას თქმით, დღეს თითოეული პოლიტიკოსის სიტყვას ძალიან დიდი მნიშვნელობა აქვს.

"გიგი უგულავას განცხადება იყო კატასტროფა, ვგმობ და არ ვეთანხმები. გამიხარდა, რომ ამაზე ბოდიში მოიხადა. ყველა უნდა ვიყოთ ძალიან ფრთხილად. საერთოდ კომენტარიც კი არ მინდა იმაზე, რომ არ არსებობს საქართველოში ვინმეს ბავშვი და ოჯახის წევრი, რომელსაც რაიმე სახით რამე უნდა ეხებოდეს" - განაცხადა ელენე ხოშტარიამ.

გიგი უგულავამ 9 ნოემბერს პარლამენტის შენობის წინ მიმდინარე გაერთიანებული ოპოზიციის აქციაზე სიტყვით გამოსვლისას განაცხადა:

"აი, იმ ვიღაცა „მოხვედი ჩიტოს” რომ იძახის, აი, იმ ვიღაც ორდენიძის, მე ძალიან არ მიყვარს საქმეში გავრიო ოჯახი და ბავშვები, მაგრამ ამ ნაგვის, ვინც ხელი აღმართა პრეზიდენტზე, უნდა იცოდნენ, მისი შვილის მეგობრებმა და კლასელებმა, რომ მამა ჰყავს ჯალათი. ყველა ბოძზე უნდა გამოვაკრათ ასეთი ჯალათები. ყველამ უნდა იცოდეს, რომ ასეთი ადამიანების ფეხქვეშ მიწა დაიწვება, რადგან ის, რასაც თქვენ აკეთებთ და ამზადებთ, დაანგრევს ამ ქვეყანას, გააუბედურებს უამრავ ადამიანს, ცრემლებს დააღვრევინებს უფრო მეტად, ვიდრე მდინარეებია ამ ქვეყანაში და თქვენ ტყუილად გგონიათ, რომ გაიხარებთ ამ უბედურების ჟამს. თქვენი შვილები შეგაფურთხებენ სახეში, თუ ამ ქვეყანაში უბედურება დატრიალდა", - განაცხადა გიგი უგულავამ.

უგულავას ეს განცხადება ასევე გააკრიტიკეს სახალხო დამცველმა ნინო ლომჯარიამ და სხვა უფლებადამცველებმა.

ამავე თემაზე:

🔲 სახალხო დამცველი გმობს გიგი უგულავას განცხადებას 

🔲 „გთხოვთ ყველას, არ ჩართოთ ბავშვები ამ არეულობაში“ - უფლებადამცველი გიგი უგულავას განცხადებას ეხმაურება