"ვახშმად ძველი მჭადი გვქონდა, ახალი მთვარე ანათებდა და გვიხაროდა" - რას წერს გიორგი კეკელიძე

მწერალი, ეროვნული ბიბლიოთეკის დირექტორი გიორგი კეკელიძე სოციალურ ქსელში წერს:

"იყო და არა იყო არა.

იყო ცაზე ვარსკვლავები და ისე მოებნიათ, თითქოს ჯვალოზე წუხელ დაფშვნილი სიმინდიაო და ქარი ღრუბლის თხელი წაღებით ფრთხილად დადიოდა, ფეხი არ სტკენოდა აქაოდა.

ვახშმად ძველი მჭადი გვქონდა და ახალი მთვარე ანათებდა და სიხარული გვიხაროდა.

სხვა არაფერი გასახარი.

ამ სიხარულს კიდევ რამე კონკრეტული და ზუსტი სახელი არ ერქვა და თუ მაინცდამაინც დაიჟინებთ და სახელს დავარქმევთ - ეს სიხარული იყო ღუმელზე გასაშრობად შემოწყობილი შეშა, ამ შეშებს შუა ბევრგან ამოტეხილი ჩაიდანი სხვათაშორისი და ფრთხილი სტვენით, ლამპა შუშა გალანცული, ჩვენი ჟირაფებივით წაგრძელებული ჩრდილებით კედელზე და ამ ჩრდილებზე სიცილი იყო ეს სიხარული.

იყო კედელზე ჰემინგუეის პორტრეტი და კედელზე სტალინი-ჩერჩილი-რუზველტის პორტრეტი და კედელზე კედლის რადიო.

მკვდარი.

დომინოში მეზობელი რომ ბაზარში გაიარდა - ესეც.

ეს ბოლო წინადადება ახალი თაობის ადამიანისთვის წინადადებადვე გაუგებარია, არათუ სიხარულის მიზეზად.

ასე რომ შეგვიძლია გამოვტოვოთ.

მოკლედ ვიყავით ხუთი და გვიხაროდა.

ყოველი დღე ერთმანეთს ჰგავდა.

ეს სიხარულის ატრიბუტებიც ერთნაირი იყო.

მაგრამ ჩვენ მაინც და მაინც რომელიღაც დღეს გვიხაროდა.

რატომ იმ საღამოს - ნუ მკითხავთ.

არც მე ვიცი", - წერს გიორგი კეკელიძე.

სხვა სიახლეები:

🔳 ჩაიჩურჩულა ბებიამ ძალიან უცნაურ პასუხად და გურული პირჯვარი გადაიწერა. სწრაფი, არითმიული. მამაზეციერი რომ ძლივს შეამჩნევს - გიორგი კეკელიძე

🔳 "რომ იცოდეს ნანამ, რა უბედური და დაღუპული იყო მისი ჩამოსვლით ოჯახი, ინატრებდა ჰაერშივე აფეთქებულიყო თვითმფრინავი" - ემიგრანტის ისტორია

🔳 ნანა გეგეჭკორი: ომიკრონით გამოწვეული კოვიდ -19 ნამდვილად არის ბევრად უფრო მსუბუქი და ნაკლებად სასიკვდილო დაავადება - აკონტროლეთ თქვენი ქრონიკული პრობლემები