"მინდა ასეთი დაგამახსოვრდეთ: – მებრძოლი ბიჭი, რომელსაც ბერეტი ძალიან უხდებოდა"

ფეისბუკმომხმარებელი, ეკატერინე ჟვანია, დღეს გარდაცვლილი თბილისის ვიცე მერის ილია ელოშვილის ფოტოს აქვეყნებს და წერს:

"ეს პატარა ბიჭი, სახლიდან ომში გაპარული ილიაა.

დიახ ეს ბუნჩულა, კეთილი, ადამიანი აფხაზეთის ომგამოვლილი, მებრძოლი სულის ბიჭი იყო.

როცა ვნახე სამინისტროში 2012 წელს, ჩემი სკოლელი , ჩემი უბნელი ისე გამიხარდა–ჩემთვის უცხო და “რაღაცნაირ” გარემოში ბედის საჩუქრად დამხვდა.

რთული პირადი პერიოდი ჰქონდა ემოციურად, “მელაპარაკე დედუ” …. ძალიან დიდი ხანია არ გვილაპარაკია.

დღეს დილიდან “ველაპარაკები”, “ვეჩხუბე” კიდეც…. ბერეტი როგორ გიხდებოდა, ატარეთქო და – ტეხავს ახლა მინისტრის ტოლა კაცი ბერეტით ხომ არ ვივლიო და უხერხულად იცინოდა  — აი რომ სიამოვნებს კომპლიმენტი და თან არ იმჩნევს.

ბევრ რამეს არ იმჩნევდა.

ბევრს.

დილიდან ვალაგებდი ტექსტს და დავჩლუნგდი მგონი არეულად ვწერ.

ვერ გამოვხატავ.

უბრალოდ მინდა ასეთი დაგამახსოვრდეთ: – მებრძოლი ბიჭი, რომელსაც ბერეტი ძალიან უხდებოდა", - წერს ჟვანია.

ილია ელოშვილი 47 წლის იყო, მას მეუღლე და ორი შვილი დარჩა. ელოშვილი თბილისის მერის მოადგილის თანამდებობას 2021 წლიდან იკავებდა, იქამდე ენერგეტიკის მინისტრი, მანამდე კი ენერგეტიკის მინისტრის მოადგილე იყო.

ილია ელოშვილის გარდაცვალების ფაქტთან დაკავშირებით შინაგან საქმეთა სამინისტრომ გამოძიება სისხლის სამართლის კოდექსის 115-ე მუხლით დაიწყო, რაც თვითმკვლელობამდე მიყვანას გულისხმობს.

ამავე თემაზე:

"16 წლის ასაკში წავიდა აფხაზეთის ომში... მეთაურმა სცადა სახლში გაეშვა, არ მიდიოდა..." - ამირან სალუქვაძე ილია ელოშვილზე ემოციურ ისტორიას აქვეყნებს