"მხედრიონი შემოვიდა, წიგნებს გადავეფარეთ, რომ ოთახი არ გაეტეხათ და გაეძარცვათ" - რა ისტორიას იხსენებს ბიბლიოთეკარი ირმა კვირკვია

საქართველოს პარლამენტის ეროვნული ბიბლიოთეკის ბიბლიოთეკარი ირმა კვირკვია:

"ფილოლოგიურის მეორე კურსის სტუდენტი ვიყავი, როცა დაუსწრებელზე გადავიტანე საბუთები და ოჯახში ვთქვი, აუცილებლად ბიბლიოთეკაში უნდა ვიმუშაო-მეთქი.

ჩემი მშობლები შეშფოთდნენ.

არ ელოდნენ, რომ მუშაობის სურვილი ასე ადრეულ ასაკში გამიჩნდებოდა, დაუსწრებელზე გადავიდოდი, და თანაც, ბიბლიოთეკაში მოვინდომებდი მუშაობას.

ბევრი ფიქრის შემდეგ დედამ მხარი დამიჭირა, მივედით ქალაქის ცენტრალურ ბიბლიოთეკაში და ამიყვანეს კიდეც სტაჟიორად.

იმ დღიდან მოყოლებული, აქ ვარ.

გარკვეული პერიოდი ქალაქის ცენტრალურ ბიბლიოთეკაში ვმუშაობდი, შემდეგ საბავშვოში.

იყო პერიოდი, ერთდროულად სკოლასა და ბიბლიოთეკაში ვმუშაობდი და როცა ჩემი ცხოვრების დღის წესრიგში პედაგოგობასა და ბიბლიოთეკარობას შორის არჩევანის გაკეთების საკითხი დადგა, სკოლა დავტოვე და ბიბლიოთეკა ავირჩიე.

მახსენდება მხედრიონის შემოსვლა ქალაქში... სამსახურები დაიკეტა, ყველა სახლში იყო, ქალაქი ნაცრისფერი და ნატყვიარი.

ამ დროს მირეკავს ჩემი თანამშრომელი და მეუბნება, რა ვუყოთ ჩვენს ბიბლიოთეკას, როგორ გადავარჩინოთ წიგნებიო.

ერთი წამითაც არ დავფიქრებულვართ და გამოვედით ორივე ქალაქში.

ფაქტობრივად წიგნებს გადავეფარეთ, რომ ოთახი არ გაეტეხათ და გაეძარცვათ.

აქ არის ის სამყარო, რომელიც ყველაზე მეტად მავსებს.

აქ არის ახალგაზრდებთან ურთიერთობა, იდეების განხორციელების გენერირება, სიახლეების ძიება... ყველაზე გულში ჩამწვდომი ყოველდღიურობა.

ეს სივრცე, ეს გარემო, უშუალო ურთიერთობა მკითხველთან, მაინც სულ სხვაა. ვერ შეველიე!",- აცხადებს ირმა კვირკვია.

სხვა სიახლეები:

* "კოვიდის ინფიცირებისა და სიკვდილიანობის მაჩვენებლები გლობალურად მცირდება 2022 წლის მარტიდან" - გიორგი ფხაკაძე სასიხარულო ინფორმაციას აქვეყნებს

* საგამოძიებო სამსახურმა განსაკუთრებით დიდი ოდენობით მოძრავი ნივთის კონტრაბანდის ფაქტზე ერთი პირი პასუხისგებაში მისცა