ალუდა ღუდუშაური ირანის ელჩის განცხადებაზე: ბუნებრივია თვალყურს ვადევნებთ და დარწმუნებული ვარ, რომ ამაზე რეაგირება იქნება

პარლამენტის ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარის პირველი მოადგილის ალუდა ღუდუშაურის განცხადებით, ირანის ელჩის მიერ სოციალურ ქსელში გამოქვეყნებულ პოსტს რეაგირება მოჰყვება. ელჩმა დაწერა, რომ თბილისში ირანის საელჩოს ფასადი ქეთევან დედოფლის გამოსახულებით განათდა, რაც ისტორიული მეხსიერების სიმბოლოა.

„არავინ არაფერზე არ დუმს. სადაც არის სიმართლე, სადაც არის ისტორია და სადაც არის სწორედაც ჭეშმარიტება, ბუნებრივია, რომ ჩვენ იქ ვდგავართ – ეს ერთი. ახლა, რაც შეეხება ამ ყველაფერს, რა თქმა უნდა, ჩვენ ყველას, ვისაც ნასწავლი გვაქვს და ვიცით საქართველოს ისტორია, ბუნებრივია, ვიცით რეალობა – ეს მეორე. ახლა მესამე: თუ ვიცით ჩვენ ეს რეალობა, ასეთ შემთხვევაში ბუნებრივია და ცალსახაა, რომ ამაზე რეაგირებას ახდენს საგარეო საქმეთა სამინისტრო. ეს არის მისი ცალსახა კომპეტენცია, მისი უფლება და, ამავდროულად, მოვალეობა. ამიტომ ჩვენ ყველანი, რა თქმა უნდა, ბუნებრივია, თვალყურს ვადევნებთ და მე დარწმუნებული ვარ, რომ ამაზე იქნება რეაგირება. ჩვენი ისტორიის ის სწორი ხაზი, რაც არის და რაც ჩვენ ვიცით, ბუნებრივია, ამის ვერც შეცვლა, ვერც სხვაგვარად წარმოჩენა ვერ და არ იქნება“, – აცხადებს ალუდა ღუდუშაური.

დიპლომატმა ქეთევან დედოფალზე თავისი გამოკვლევისა და მიგნებების გამოქვეყნება დააანონსა.