რუსეთი საქართველოს ოკუპაციას ახდენს, ანუ დამოუკიდებლობას გვართმევს - რას წერს სოციოლოგი იაგო კაჭკაჭიშვილი

არასამთავრობო კვლევითი ორგანიზაცია „სოციალური კვლევისა და ანალიზის ინსტიტუტის“ ხელმძღვანელი, სოციოლოგიის დოქტორი იაგო კაჭკაჭიშვილი სოციალურ ქსელში წერს:

„რასაც ახლა დავწერ, უბრალოდ ვარაუდი არ არის, ხანგრძლივი დაკვირვებისა და კვლევების შედეგია. შევეცდები, მოკლედ და გასაგებად ჩამოვაყალიბო:

საქართველოს საზოგადოების გამოკვეთილი უმრავლესობის მისწრაფება დასავლეთისკენ და დასავლურ სტრუქტურებში ინტეგრაციისკენ არის პოლიტიკური ელიტების რიტორიკის (ანუ, ზემოდან „ზეწოლის“) შედეგი, რომელიც 1990 წლებიდან მოყოლებული ძირითადად დაუკავშირდა და გამყარდა ქვეყნის დამოუკიდებლობის იდეით (შეგვიძლია ეს პროცესი 1918 წლიდანაც დავიწყოთ).

დასავლეთთან ინტეგრაციისკენ მისწრაფება საქართველოში არ უკავშირდება დემოკრატიული ღირებულებების მიმართ ერთგულებას.

მეტიც: როგორც კი ევროკავშირთან ინტეგრაციის თითქოს საყოველთაოდ გაზიარებულ იდეას კონკრეტულ ინდიკატორებად დავშლით და ვიტყვით, რომ ეს იდეა ნიშნავს უმცირესობების უფლებების დაცვას, სიტყვის (მედიის) თავისუფლებას, სეკულარიზმს (ანუ მართლმადიდებლური ინსტიტუტების უნივერსალური გავლენის უარყოფას) და ა.შ., თითოეული ამ ინდიკატორის მიმართ უმრავლესობა სკეპტიკურადაა განწყობილი და დემოკრატიის მიმართ მისი ლოიალობაც გაიწოვება.

შესაბამისად, რუსეთის არმოწონებას საქართველოში ის კი არ ასაზრდოებს, რომ რუსეთი ანტიდემოკრატიული ქვეყანაა, არამედ ის, რომ რუსეთი საქართველოს ოკუპაციას ახდენს, ანუ დამოუკიდებლობას გვართმევს.

„ქართული ოცნების“ ხელისუფლებაში ყოფნის გახანგრძლივების ერთ-ერთი ძირითადი ფაქტორიც ესაა.

ძალიან პესიმისტურად რომ არ გამომივიდეს, ვიტყვი, რომ ერთადერთი ჯგუფი, რომელშიც დასავლური მისწრაფებები თანაბრად და სტაბილურად უკავშირდება როგორც საქართველოს დამოუკიდებლობას, ისე დემოკრატიულ ღირებულებებს, ახალგაზრდობაა.“ - წერს იაგო კაჭკაჭიშვილი.

ასევე საინტერესოა:

🔵  მიხეილ ყაველაშვილი: ჩემმა დაგინებამ აღფრთოვანება გამოიწვია ხალხში ... ხალხი მირეკავდა და გახარებული იყო...

🔵 „ვინც იღებს პასუხისმგებლობას, რომ ბახვას ყველა ქრისტიანული წესის დაცვით მივაბარებთ თავის მამიკოს, ძმას, წინაპრებს...“ - ხათუნა ხოფერია

🔵 უკრაინის ვიცე-პრემიერი: რუსეთთან შეთანხმებით უსაფრთხოების სამი დერეფანი ამოქმედდება, მათ შორის მარიუპოლში