"სხვადასხვა პარტიას შორის პენი*ების დატოლება საერთო საქმეს დააზიანებს" - გია ნოდია 20 ივნისს დაანონსებულ აქციაზე

"სხვადასხვა პარტიას შორის პენისების დატოლება საერთო საქმეს დააზიანებს", - ასე ეხმაურება ექსპერტი გია ნოდია 20 ივნისის დაანონსებულ აქციას და სოციალურ ქსელში პოსტს აქვეყნებს.

"ფეისბუკში" ხალხი ბრაზობს ვიღაცებზე, ვინც თითქოს ამბობს, რომ 20 ივნისის მიტინგი „არაპოლიტიკური“ უნდა იყოს, ან რომ მასში პოლიტიკურმა პარტიებმა მონაწილეობა არ უნდა მიიღონ.

ოღონდ არ ამბობენ, კონკრეტულად ვინ ჰყავთ მხედველობაში.

რომ ჩავუღრმავდი, აღმოჩნდა, რომ მამუკა ხაზარაძეა კრიტიკის მთავარი ობიექტი.

გადავამოწმე და მას მხოლოდ ის უთქვამს, რომ მიტინგზე კონკრეტული პარტიების დღის წესრიგი კი არ უნდა იყოს წინა პლანზე, არამედ ის, რაც გვაერთიანებს: საქართველოს ევროპული მომავალი.

ეს, ჩემი აზრით, სრულიად სწორია.

რა თქმა უნდა, 20 ივნისის მიტინგი აპრიორი პოლიტიკურია; პარტიებმა, ვისთვისაც ევროინტეგრაცია მნიშვნელოვანი თემაა, მასში აქტიური მონაწილეობა უნდა მიიღონ.

მაგრამ ისიც ცხადია, რომ სხვადასხვა პარტიას შორის პენისების დატოლება (რის გარეშე პარტიებს, მათი ბუნებიდან გამომდინარე, არ შეუძლიათ) საერთო საქმეს დააზიანებს.

მოგვწონს ეს ფაქტი თუ არა, საზოგადოებაში, რომელშიც ვცხოვრობთ, ძალიან ბევრი ადამიანი პოლიტიკურ პარტიებს არ ენდობა; შეიძლება მათ ამაში არ დავეთანხმოთ, თუმცა საერთო ინტერესშია, რომ მიტინგზე ასეთი ადამიანებიც მოვიდნენ.

ხელისუფლება ამ ყველაფერს ნებისმიერ შემთხვევაში ნაცების მიტინგად გამოაცხადებს: ასეთი რაღაცების დაიგნორება უნდა ვისწავლოთ.

არსებობს ევრომაიდანის მაგალითი:

იქ პოლიტიკური პარტიები მონაწილეობდნენ, მაგრამ წამყვანი მოთამაშეები არ იყვნენ. გამოკვეთილი ლიდერი არ არსებობდა, მაგრამ პროცესი ორგანიზებული იყო. როგორც ჩანს, ეს ყველაზე მოგებიანი ფორმულაა.

თუ პრეტენზია გვაქვს, რომ ევროპელები ვართ, პირველ რიგში ეს იმით უნდა ვაჩვენოთ, რომ სხვადასხვა შეხედულებების და პრიორიტეტების ადამიანებს ერთად დგომა შეგვიძლია, როცა ქვეყნისთვის ძირეული პრინციპების დაცვას ეხება საქმე“, - წერს გია ნოდია.

ამავე თემაზე:

* „ახლა მე მაქვს შეკითხვა „ოცნებასთან“: ომი გინდათ?!!!!! ომი გექნებათ საქართველოს მოსახლეობასთან“ - პაატა ბურჭულაძე

* ხათუნა ხოფერია: „20 ივნისს დაანონსდა ნაცსექტის აქცია, რომლის მთავარი ორგანიზატორი ახალგაზრდა "ნაციონალების" ორი დაჯგუფებაა“

* თბილისში 20 ივნისს აქცია "შინ ევროპისკენ" გაიმართება - "ამ დღეს, არ უნდა იყოს არცერთი დროშა გარდა საქართველოს და ევროკავშირისა"