ვერ ვხვდები, როგორ უნდა შეთანხმდეს ოლიგარქიისა და პოლარიზაციის პირობებში ყველა პოლიტიკური და სამოქალაქო ჯგუფი, როგორც ეს იდეის ავტორებს წარმოუდგენიათ - ირაკლი აბსანძე ტექნიკურ მთავრობაზე

ჟურნალისტი ირაკლი აბსანძე, ფეისბუკის საკუთარ გვერდზე წერს:

"ტექნიკური მთავრობა არაკონსტიტუციური რომ არაა, გავიგე. ისიც მესმის, რომ ეს მექანიზმი აპრობირებულია და ემპირიას ეყრდნობა.
მაგრამ, ვერ ვხვდები, როგორ უნდა შეთანხმდეს ოლიგარქიისა და პოლარიზაციის პირობებში ყველა პოლიტიკური და სამოქალაქო ჯგუფი, როგორც ეს იდეის ავტორებს წარმოუდგენიათ. მთავრობის წევრობის კანდიდატებიც ხომ შესათანხმებელი იქნება, რაც კიდევ უფრო რთულად წარმომიდგენია.
ერთადერთი პირობაა, რაც ამას შესაძლებელს გახდის. ბიძინა და "ოცნება" ხალხის წნეხით მორალურად უნდა ჩამოიშალოს და დემორალიზებული საპარლამენტო უმრავლესობა ყველაფერს დათანხმდება, რასაც მოვითხოვთ.
თუ ეს ასეა და მხოლოდ ამ დაშვებით ხედავენ ინიციატორები წარმატების შანსს, ჩვენც უნდა გვითხრან, ალბათ. მკაფიოდ და გარკვევით.
მეორე ამბავია რეფორმები. ყველა ვხვდებით, რომ 6 თვეში ძირეული და შინაარსობრივი რეფორმების დაწყება და დასრულება შეუძლებელია. აქაც ივანიშვილის პოლიტიკიდან განრიდების ფაქტორია, ალბათ, გათვალისწინებული.
მაგალითად, სასამართლოს რეფორმას 6 თვეში ვერ დავასრულებთ, მაგრამ ეს დრო აბსოლუტურად საკმარისია კლანის დასაშლელად, რაც, თავისთავად, ისევ ბიძინას განრიდებამდე მიდის.
ევროკავშირი ჩვენგან გაწიკწიკებულ და ბოლომდე მიყვანილ რეფორმებს არ ითხოვს. თუ ვაჩვენეთ, რომ რაღაც პრინციპულად შეიცვალა და სწორ გზას დავადექით, დაგვიჯერებენ.
და ბოლოს. არ მაქვს პასუხი, რატომ არ შეიძლება ზემოთნათქვამი დაშვებით ვადამდელი არჩევნებისკენ წავიდეთ? თუ დემორალიზებული საპარლამენტო უმრავლესობა ტექნიკურ მთავრობას დათანხმდა, უფრო მარტივად დათანხმდება ვადამდელს, მე-2 და მე-3 მოსმენით მიიღებს საკონსტიტუციო ცლილებებს 2%-ანი ბარიერით სრულად პროპორციულზე გადასასვლელად და დათმობს საარჩევნო ადმინისტრაციას.
არც მე ვარ ჩვენი პოლიტიკური კლასით აღფრთოვანებული, მაგრამ პროექტის მენეჯერები ხომ ვერ მართავენ გრძელვადიანად ქვეყანას? პოლიტიკოსები ამ 6 თვეში თვისობრივად ვერ შეიცლებიან. რაც გვაქვს, იქედან მოგვიწევს არჩევანის გაკეთება ამ 6 თვის შემდეგაც",-წერს, ირაკლი აბსანძე.

ასევე დაგაინტერესებთ:

🔵არ ვიბრძვით სკამებისთვის, მთავრობაში სახეები და პოლიტიკოსები არ უნდა იყვნენ - შოთა დიღმელაშვილი

🔵ლევან კბილაშვილი სრულიად ახალგაზრდა წავიდა ჩვენგან და თან გაიყოლა მრავალთა გულისტკივილი - ილია მეორე