"ზელენსკის ესმის, რომ უკრაინის ხარჯზე ჩვენც ვთავისუფლდებით და ახალი ისტორიული, ჯერარმოცემული შანსები გვეძლევა, თანაც უომრად, ამიტომ გაიწვია ელჩი" - ნათია ფანჯიკიძე

ფსიქოლოგი, ფსიქო ცენტრ "კამარას" დამფუძნებელი ნათია ფანჯიკიძე სოციალურ ქსელ ფეისბუკში ზელენსკის მიერ საქართველოდან უკრაინის ელჩის საბოლოოდ გაწვევას ეხმაურება:

"ქართველები ძალიან მგრძნობიარეები ვართ.

უცებ გვწყინს.

როგორც ჩანს, ზელენსკიც მგრძნობიარეა და ჩვენგან განსაკუთრებით სწყინს, ამიტომ გაიწვია ელჩი.

ცივ გონებაზე, მე არ გავიწვევდი, ომის საშინელებით ფსიქიკაშეცვლილი, ალბათ მეც გავიწვევდი.

ზელენსკის ესმის, რომ უკრაინის ხარჯზე ჩვენც ვთავისუფლდებით და ახალი ისტორიული, ჯერარმოცემული შანსები გვეძლევა, თანაც უომრად.

მხოლოდ პოზიციის მკაფიოობაა საჭირო და ესეც ვერ შეძლო ჩვენმა მთავრობამ.

რუსული მესიჯებით ეწევიან ზელენსკის დისკრედიტაციას მათი ტროლებიც, მღვდლებიც, რიგითი ოცნებისტებიც.

მიუხედავად იმისა, რომ ათას მადლობას გვიხდის ქართველ ხალხს, ჩვენც ვხედავთ, რომ მთავრობის ოფიციალური განცხადებები არის ცრუქუცული, აი ეშმაკობასაც რომ ვერ დაარქმევ, მშიშრული, არაპროფესიონალური, არა იმ მთავრობის და იმ ერის, ვისაც თავისუფლება უნდა.

სისხლით მორწყულ თავის ქვეყანას რომ უყურებს, ადამიანურად სრულიად გასაგებია, რატომ აქვს პროტესტი, არ გვასარგებლოს იმ მომავლით, რომლისთვისაც თვითონ ეწამებიან", - წერს ნათია ფანჯიკიძე სოციალურ ქსელში.

ცნობისათვის, ვოლოდიმირ ზელენსკიმ მაროკოდან და საქართველოდან ელჩების გაწვევას ხელი მოაწერა. ზელენსკიმ ვიდეომიმართვისას უკრაინის დიპლომატიური მისიების წარმომადგენლების მუშაობაზე ისაუბრა და აღნიშნა, რომ სხვა სამსახური უნდა მოძებნონ იმ ელჩებმა, რომლებიც ვერ მიაღწევენ, რომ ქვეყნები, სადაც წარმოდგენილნი არიან, ერთი მხრივ უკრაინას დაეხმარებიან, მეორე მხრივ კი რუსეთს სანქციებს დააკისრებენ.

ამავე თემაზე:

🔵 ზელენსკიმ საქართველოდან ელჩი გაიწვია - უკრაინის პრეზიდენტმა ბრძანებას ხელი უკვე მოაწერა

🔵 "ზელენკიმ ელჩი უკვე მართლაც გაიწვია - რადგან მან ვერ იმუშავა და უკრაინას საქართველოდან ვერც იარაღი მოუტანა და ვერც რუსეთისთვის სანქცია"