დანიელი ფეხბურთელის გულის შეტევა შესაძლოა, კოვიდ 19-ის სუბ-კლინიკურმა ინფექციამ გამოიწვია - "ტოტენჰემის" ყოფილი ექიმი

„ტოტენჰემის“ ყოფილმა ექიმმა, პროფესორმა სანჯაი შარმამ, ევრო 2020-ზე დანია-ფინეთის მატჩის დროს კრისტიან ერიკსენის გარშემო შექმნილ ვითარებაზე ისაუბრა.

სანჯაი ერიკსენის ყოფილი კლუბის ექიმი იყო და სამედიცინო შემოწმების დროს მას ყოველ წელს ფიზიკურ კონდიციებს უმოწმებდა - ექიმის კომენტარს Dailymail ავრცელებს.

„უნდა გვახსოვდეს, რომ ერიკსენი ჯანმრთელი ადამიანია. მას ფანტასტიკური სისხლის მიმოქცევა აქვს. ვლოცულობდი, რომ ის გადარჩენილიყო. მას რომ გულ-ფილტვის რეანიმაცია დასჭირვებოდა და ექიმებს რომ დეფიბრილატორი გამოეყენებინათ, ვიტყოდი, რომ მას გულის რითმის დარღვევის გამო წამიერი გულის გაჩერება მოუვიდა, მაგრამ დავინახე, რომ ის ბურთისკენ გაიქცა და კონტროლი დაკარგა. აშკარაა, რომ იმ მომენტში რაღაც აერია.

ერიკსენს „ტოტენჰემში“ ყოველ წელს ვამოწმებდი. 2019 წლამდე, მისი პასუხები ნორმალური იყო, გულის პრობლემები არ დაფიქსირებულა. შემიძლია დავიფიცო, რომ ამ ტესტებს ვატარებდი. მომხდარის გამო, ყველა შედეგი გადავამოწმე და ყველაფერი იდეალურად გამოიყურებოდა. შესაძლოა, მიზეზი კორონავირუსი იყოს. ზოგიერთ ფეხბურთელს შესაძლოა კოვიდ19-ის სუბ-კლინიკური ინფექცია ჰქონოდათ, რამაც გულის რითმის დარღვევა გამოიწვია.“ - განაცხადა ექიმმა.

გუშინ დანიისა და ფინეთის ნაკრებების მატჩი 42-ე წუთზე შეწყდა. მარცხენა ფლანგზე ბურთის მიღების შემდეგ დანიის ნაკრების ფეხბურთელი კრისტიან ერიკსენი შეუძლოდ გახდა და მოედანზე დაეცა. ფეხბურთელს კორონავირუსი გადატანილი ჰქონდა.