იტალია რუსეთს საჰაერო სივრცეს ჩაუკეტავს!

იტალიურ პრესაში ვრცელდება ოფიციალური ინფორმაცია, რომელსაც იტალიაში მცხოვრები ქართველი ემიგრანტები მოუთმენლად ელოდნენ. იტალია შეურთდა იმ ქვეყნებს, რომლებიც რუსეთს საჰაერო სივრცეს ჩაუკეტავენ.

იტალია, გერმანია, ირლანდია, დანია, ფინეთი, ავსტრია და ბელგია დაემატნენ იმ ქვეყნების სიას, რომლებმაც მიიღეს გადაწყვეტილება რუსეთისთვის საჰაერო სივრცის ჩაკეტვის შესახებ. ამის შესახებ პრესისთვის გაკეთებულ განცხადებაში, ევროკომისიის პრეზიდენტმა, ურსულა ფონ დერ ლაიენმა ისაუბრა.

იტალიის პრემიერმინისტრი, მარიო დრაგი სრულად იზიარებს და ეთანხმება ევროპის ქვეყნების გადაწყვეტილებებს რუსეთის მიმართ სანქციების შესახებ.

მანამდე, რუსეთისთვის საჰაერო სივრცის დაკეტვის შესახებ გადაწყვეტილება მიიღეს დიდმა ბრიტანეთმა, ლიეტუვამ, ლატვიამ, ესტონეთმა, სლოვენიამ, ჩეხეთმა, პოლონეთმა, რუმინეთმა, გერმანიამ და ბულგარეთმა. უცნობია როდის შევა ზომები ძალაში.

იტალიური პრესა, უწყვეტ რეჟიმში აგრძელებს უკრაინაში განვითარებული მოვლენების გაშუქებას. პრესა იუწყება, რომ კიევის თავზე, ცა, მეოთხე ღამეა, აფეთქებების გამო გადანათებულია. ბრძოლა გრძელდება უკრაინის დედაქალაქში, რომელიც არ ნებდება რუსული ძალების თავდასხმას. გამთენიისას რუსული ჯარები შევიდნენ ხარკოვში, მაგრამ მოგვიანებით, უკრაინის არმიამ განაცხადა, რომ სიტუაციაზე კონტროლი აღადგინა.