კანადა კრემლს ახალ სანქციებს უწესებს - მძიმე ფასს გადავახდევინებთ რუსულ ელიტას

კანადა კრემლს ახალ სანქციებს უწესებს. „მძიმე ფასს გადავახდევინებთ რუსულ ელიტას“, -  ამის შესახებ კანადის პრემიერმინისტრმა, ჯასტინ ტრუდომ განაცხადა.

„კანადა ცალსახად გმობს რუსეთის გაუმართლებელ თავდასხმას სუვერენულ და  დემოკრატიულ უკრაინის სახელმწიფოზე. პრეზიდენტ პუტინის მიერ საერთაშორისო სამართლის, დემოკრატიის, ადამიანის სიცოცხლის თავხედური უგულებელყოფა დიდი საფრთხეა მსოფლიოს უსაფრთხოებისა და მშვიდობისთვის", - თქვა მან.

მისი თქმით, კანადა მკაცრ სანქციებს უწესებს 58 პირსა და სუბიექტს, მათ შორის რუსეთის ელიტის წარმომადგენლებსა და მათ ოჯახის წევრებს.

„ჩვენ სანქციებს დავუწესებთ რუსეთის უშიშროების საბჭოს წევრებს, მათ შორის თავდაცვის, ფინანსთა და იუსტიციის მინისტრს. ამას სერიოზული გავლენა ექნება. ის მძიმე ხარჯს დააკისრებს რუსულ ელიტას და შეზღუდავს პრეზიდენტ პუტინის შესაძლებლობას, რომ დააფინანსოს გაუმართლებელი შეჭრა უკრაინაში", - თქვა კანადის პრემიერმინისტრმა.

განცხადებაში ტრუდომ აღნიშნა, რომ პუტინის ქმედებები მეორე მსოფლიო ომის შემდეგ, ევროპისთვის ყველაზე დიდი საფრთხეა. მისივე თქმით, ის უკრაინის პრეზიდენტ ვოლოდიმირ ზელენსკის ესაუბრა.

„მე მას ვუთხარი, რომ ჩვენ მტკიცე ნაბიჯებს გამოვაცხადებდით და გავაგრძელებთ მის და უკრაინელი ხალხის გვერდში დგომას", - თქვა მან.

ასევე საინტერესოა:

🔵 ზმეინის კუნძულზე 13 უკრაინელი მესაზღვრე დაიღუპა

🔵 18-დან 60 წლამდე კაცებს ქვეყნის დატოვება ეკრძალებათ - უკრაინის საბაჟოს ხელმძღვანელი

🔵 სალომე ზურაბიშვილი უკრაინელ ხალხს: „ჩვენ თქვენთვის ვლოცულობთ“