ხარკოვში შეტაკებებს 20 წლის უკრაინელი სპორტსმენი ემსხვერპლა

"20 წლის უკრაინელი სპორტსმენი ევგენი მალიშევი ხარკოვში შეტაკებებს ემსხვერპლა", - ინფორმაციას ბიატლონის უკრაინული ფედერაცია ავრცელებს.

"ორი წლის წინ, ბიატლონისტმა იუნიორთა ნაკრებთან ერთად ვარჯიში დატოვა და ამჟამად ის,უკრაინის სამხედრო ძალებში საკონტრაქტო სამსახურში იმყოფებოდა", - აღნიშნავს სპორტული ფედერაცია.

ხარკოვის მთავარ - "თავისუფლების მოედანზე" სარაკეტო იერიში გუშინ 1 მარტს მიიტანეს. უკრაინის ხელისუფლების ინფორმაციით, დაიღუპა სულ მცირე 10 ადამიანი.

ქვეყნის პრეზიდენტი ვოლოდიმირ ზელენსკი ომის დანაშაულზე საუბრობს და აცხადებს, რომ ხარკოვში საცხოვრებელ სახლებზე იერიშის დროს კასეტური ბომბი იქნა გამოყენებული.

რუსეთი უკრაინაში 24 თებერვალს შეიჭრა და ფართომასშტაბიან ომს ატარებს. დაღუპულია ასობით მშვიდობიანი მოქალაქე, მათ შორის ათეულობით ბავშვი.

უკრაინაში შეჭრის მეექვსე დღეს რუსეთის ძალები უფრო ინტენსიურად უტევენ ქალაქებს. მათ დაბომბეს რამდენიმე მნიშვნელოვანი ადგილი კიევში და ხარკოვში, რასაც სულ მცირე 11 ადამიანი ემსხვერპლა, დაიჭრა კიდევ ათობით პირი. 

მიუხედავად იმისა, რომ უკრაინის ძალებმა შეანელეს რუსეთის არმიის წინსვლა, ოკუპანტებმა ხელში ჩაიგდეს უკრაინის ქალაქ ხერსონის რკინიგზის სადგური და მდინარის პორტი.

ამავე თემაზე:

🔳 "დილა კიევში განგაშის სირენების ჩართვით დაიწყო" - რა ვითარებაა უკრაინაში ომის დაწყებიდან მე-7 დღეს

🔳 რუსმა ოკუპანტებმა უკრაინაში ქალაქ ხერსონის რკინიგზის სადგური და მდინარის პორტი დაიკავეს