"ოკუპანტები აგრძელებენ სარაკეტო-საარტილერიო დაბომბვებს, ცდილობენ, სრულად გაანადგურონ უკრაინის ქალაქების ინფრასტრუქტურა" - უკრაინის გენშტაბი

რუსი სამხედროები აგრძელებენ სარაკეტო-საარტილერიო დაბომბვებს, ცდილობენ, სრულად გაანადგურონ უკრაინის ქალაქების ინფრასტრუქტურა და საცხოვრებელი უბნები და ასევე კონცენტრირდებიან საწვავის შესანახ ობიექტებზე.

ამის შესახებ უკრაინის შეიარაღებული ძალების გენერალური შტაბის ინფორმაციაშია აღნიშნული.

უწყების ცნობით, რუსი ოკუპანტების მოქმედებების მიზანია ლოგისტიკური მხარდაჭერის გართულება და ჰუმანიტარული კრიზისისთვის პირობების შექმნა.

„ისინი ბომბავენ საცხოვრებელ კორპუსებს. ძარცვავენ, იტაცებენ და მძევლად ჰყავთ მშვიდობიანი მოქალაქეები“, – ნათქვამია ინფორმაციაში.

ამასთან, უკრაინის შეიარაღებული ძალები აგრძელებენ თავდაცვით ოპერაციებს აღმოსავლეთ, სამხრეთ-აღმოსავლეთ და ჩრდილო-აღმოსავლეთ მიმართულებებით, აგრეთვე ახორციელებენ კონტრშეტევებს ზოგიერთი მიმართულებით.

„დონეცკისა და ლუგანსკის მიმართულებით გაერთიანებული ძალების დაჯგუფებამ გასული დღის განმავლობაში მტრის შვიდი შეტევა მოიგერია.

ჩვენმა ჯარისკაცებმა გაანადგურეს 12 ერთეული ტანკი, 10 ერთეული ქვეითთა საბრძოლო მანქანა და სამი ერთეული საავტომობილო ტექნიკა.

მტერმა ცოცხალი ძალის დანაკარგებიც განიცადა“, – ნათქვამია გენშტაბის ინფორმაციაში.

გარდა ამისა, 28 მარტს უკრაინის შეიარაღებული ძალების საჰაერო ძალებმა ოკუპანტების 17 ერთეული საფრენი აპარატი დააზიანეს – რვა ერთეული თვითმფრინავი, სამი ერთეული ვერტმფრენი, ოთხი ერთეული დრონი და ორი ერთეული საკრუიზო რაკეტა.

გენშტაბის ინფორმაციით, 24 თებერვლიდან დღემდე რუსი ოკუპანტების ცოცხალმა დანაკარგებმა 17 200 ჯარისკაცი შეადგინა.