ივანე ჩხაიძე: ქვეყანაში გრიპის საწინააღმდეგო სამკომპონენტიანი ვაქცინა შემოვა, რომელიც 80%-იანი ეფექტურობით ხასიათდება

იაშვილის სახელობის ბავშვთა ცენტრალური საავადმყოფოს სამედიცინო დირექტორის ინფორმაციით, გასული წლებისგან განსხვავებით, წელს, ქვეყანაში გრიპის საწინააღმდეგო სამკომპონენტიანი ვაქცინა შემოვა, რომელიც 80%-იანი ეფექტურობით ხასიათდება პედიატრიულ პოპულაციაში.

ივანე ჩხაიძის განმარტებით, სამკომპონენტიანი ვაქცინა ჯანმრთელობის მსოფლიო ორგანიზაციის და ამერიკის დაავადებათა კონტროლის და პრევენციის ცენტრის მიერ არის რეკომენდებული.

„ვაქცინაციისთვის იდეალური პერიოდი ოქტომბრის ბოლო და ნოემბრის დასაწყისია, ხოლო ვაქცინის შემოტანა სექტემბრის ბოლოს ან ოქტომბრის პირველ ნახევარში იგეგმება. სახელმწიფო წინა წლების მსგავსად 200 000 დოზას უზრუნველყოფს, თუმცა, პროფესორის თქმით, ეს რესურსი ბოლომდე არასდროს იხარჯება, რაც მოსახლეობის ინფორმირების ნაკლებობაზე მიუთითებს.

პირველ რიგში, გათვალისწინებულია რისკის ჯგუფებისთვის და რისკი ჯგუფებს მიეკუთვნება სწორედ მცირე ასაკის ბავშვები - ეს არის ორ წლამდე ასაკის ბავშვი, 60 წელს გადაცილებული მოსახლეობა, ქრონიკული დაავადების მქონე პირები, ორსულები, 6 თვიდან ზემო ასაკობრივ ჯგუფში ვაქცინაცია გრიპის დასაშვებია. ქვეყანაში შემოვა სამკომპონენტიანი ვაქცინა. სამკომპონენტიანი ვაქცინის შემადგენლობაში შევა ორი A ტიპის გრიპის ვირუსის საწინააღმდეგო კომპონენტი და ერთი B ტიპის ვირუსის საწინააღმდეგო კომპონენტი და 80%-იანი ეფექტურობით ხასიათდება.

გასულ წელს 4 კომპონენტიანი იყო, აქედან 2 „ა“ ტიპის და 2 „ბე“ ტიპის ვირუსის, თუმცა, „ბე“ ტიპის ვირუსი, რომელიც შესული იყო ამ ვაქცინის შემადგენლობაში, ბოლო პერიოდში აღარ იწვევს დაავადებებს. ჯანმრთელობის მსოფლიო ორგანიზაციის და ამერიკის დაავადებათა კონტროლის და პრევენციის ცენტრის რეკომენდაციით, 3 კომპონენტიანია რეკომენდებული“, - აცხადებს იაშვილის სახელობის ბავშვთა ცენტრალური საავადმყოფოს სამედიცინო დირექტორი.