დონბასელი სეპარატისტების მიერ დაბომბვის შედეგად უკრაინელი ჯარისკაცი დაიღუპა

უკრაინის გაერთიანებული ძალების ინფორმაციით, 19 თებერვლის დილის 9:00 საათის მონაცემებით, დონბასელი სეპარატისტების მიერ ცეცხლის შეწყვეტის პირობების 19-ჯერ დარღვევა დააფიქსირეს.

გავრცელებულ განცხადებაში აღნიშნულია, რომ საარტილერიო დაბომბვის შედეგად ერთ-ერთი უკრაინელი ჯარისკაცი სასიკვდილოდ დაიჭრა.

"ოკუპანტები აგრძელებენ სროლას დასახლებებიდან და საცხოვრებელ კორპუსებთან საარტილერიო სისტემების განთავსებას.

მტერი ამ გზით ცდილობს, აიძულოს უკრაინის ძალების ქვედანაყოფები, რომ საპასუხო ცეცხლი გახსნას, რათა უკრაინის დამცველი სამხედროები მშვიდობიანი მოსახლეობის დაბომბვაში მეტად დაადანაშაულოს.

ხაზგასმით აღვნიშნავთ, რომ გაერთიანებული ძალები ცეცხლს არ ხსნიან და საერთაშორისო ჰუმანიტარული სამართლის ნორმებს იცავენ. გაერთიანებული ძალები აკონტროლებენ სიტუაციას და ადეკვატურად რეაგირებენ მტრის პოტენციურ მუქარებზე", - აღნიშნულია განცხადებაში.

18 თებერვალს დონეცკსა და ლუგანსკში მარიონეტმა ლიდერებმა მასობრივი ევაკუაცია გამოაცხადეს და მოქალაქეებს რუსეთში გამგზავრებისკენ მოუწოდეს.

უკრაინის თავდაცვის სამინისტროს განცხადებით, ოკუპირებულ დონეცკში რუსული სპეცსამსახურები რამდენიმე სამოქალაქო ობიექტის აფეთქებასა და ამაში უკრაინის დადანაშაულებას აპირებენ.

დონბასში სიტუაცია 17 თებერვლიდან დაიძაბა. პრორუსი სეპარატისტული ძალები პროვოკაციებს განაგრძობენ.

სხვა სიახლეები:

📍გიორგი ფხაკაძე ჯანდაცვის რეფორმაზე: ეს შესაძლებელია, იცით სადაც ვარ

📍ოკუპირებულ დონეცკში საყოველთაო მობილიზაცია გამოაცხადეს

📍პოლიციამ ნარკოდანაშაულისთვის ოთხი პირი დააკავა - ამოღებულია განსაკუთრებით დიდი ოდენობით ნარკოტიკი