„ძალიან შეურაცხმყოფელი იყო, ამიტომ სრულად მესმის ჯორჯია მელონის რეაქცია“ - მარინ ლე პენმა მხარი დაუჭირა იტალიის პრემიერს მას შემდეგ, რაც დონალდ ტრამპმა იგი საჯაროდ გააკრიტიკა

საფრანგეთის ულტრამემარჯვენე პარტიის ლიდერმა მარინ ლე პენმა მხარი დაუჭირა იტალიის პრემიერ-მინისტრ ჯორჯია მელონის მას შემდეგ, რაც აშშ-ის პრეზიდენტმა დონალდ ტრამპმა იგი საჯაროდ გააკრიტიკა. წერს „პოლიტიკო“.

მისი თქმით, ეს არ ნიშნავს ორ ქვეყანას შორის ურთიერთობების გაწყვეტას, თუმცა „ორ ლიდერს შორის ურთიერთობა აშკარად სერიოზულად გაცივდა“.

„ეს ძალიან შეურაცხმყოფელი იყო, ამიტომ სრულად მესმის ჯორჯია მელონის რეაქცია, რომელიც ეროვნული ღირსების გამოხატულებაა. ნიშნავს ეს ორ ერს შორის ურთიერთობების საბოლოო წყვეტას? რა თქმა უნდა - არა. არის ეს ორ ადამიანს შორის ურთიერთობების სერიოზული გაციება? რა თქმა უნდა - არის. საერთაშორისო ურთიერთობებში მეგობრები არ არსებობენ. არსებობს ინტერესები, რომლებიც შეიძლება იყოს საერთო ან დაპირისპირებული“, - აღნიშნა საფრანგეთის ულტრამემარჯვენე პარტიის ლიდერმა.

ლე პენმა, ასევე, აღნიშნა, რომ ტრამპი კვლავ რჩება „ძლიერი პოლიტიკური ნების სიმბოლოდ“, რომლის მსგავსი ევროპაში ათწლეულებია იშვიათად უნახავთ, თუმცა საგარეო პოლიტიკაში, განსაკუთრებით ირანის საკითხთან დაკავშირებით, მან „იმის საპირისპირო გააკეთა, რასაც ამომრჩეველს ჰპირდებოდა“.

შეგახსენებთ, დაპირისპირება მას შემდეგ დაიწყო, რაც ტრამპმა განაცხადა, რომ მელონი G7-ის სამიტზე ფოტოს გადაღებას ეხვეწებოდა და მათ ურთიერთობას შიდა პოლიტიკური სარგებლისთვის იყენებდა. მელონიმ ეს ბრალდებები უარყო და განაცხადა, რომ ტრამპმა ეს ამბავი მოიგონა.